Video: "ખડગેએ પીએમના સ્વર્ગસ્થ પિતાનું કર્યું અપમાન!" – આસામમાં કોંગ્રેસ વિરુદ્ધ પ્રચંડ વિરોધ પ્રદર્શન

વડાપ્રધાન નરેન્દ્ર મોદીના સ્વર્ગસ્થ પિતા અંગે કૉંગ્રેસના રાષ્ટ્રીય અધ્યક્ષ મલ્લિકાર્જુન ખડગે દ્વારા કરવામાં આવેલી ટિપ્પણી અને દિલ્હીમાં કૉંગ્રેસ નેતાઓ દ્વારા પોલીસ સાથે કરાયેલા કથિત ગેરવર્તનના વિરોધમાં ભારતીય જનતા પાર્ટીએ આસામના ગુવાહાટી ખાતે ઉગ્ર વિરોધ પ્રદર્શન યોજ્યું હતું.

આ વિરોધ પ્રદર્શન દરમિયાન પત્રકારો સાથે વાતચીત કરતાં આસામ ભાજપના ઉપપ્રમુખ અશોક કુમાર ભટ્ટારાયે કૉંગ્રેસ પક્ષ અને તેના ટોચના નેતાઓ પર આકરા પ્રહારો કર્યા હતા.

પીએમના સ્વર્ગસ્થ પિતાનું અપમાન સહન નહીં થાય

અશોક કુમાર ભટ્ટારાયે જણાવ્યું કે, ગઈકાલે કૉંગ્રેસ પ્રમુખ મલ્લિકાર્જુન ખડગે દ્વારા દેશના વડાપ્રધાન નરેન્દ્ર મોદીના સ્વર્ગસ્થ પિતા વિરુદ્ધ અત્યંત હલકી, તુચ્છ અને વાંધાજનક ટિપ્પણી કરવામાં આવી હતી. દેશની જનતા અને ભાજપના કાર્યકરો આવી ભાષા ક્યારેય સહન નહીં કરે, અને આ જ કારણથી આજે રાજ્યભરમાં વિરોધ પ્રદર્શનનું આયોજન કરવામાં આવ્યું છે.

રાહુલ અને પ્રિયંકા ગાંધી પર મહિલા પોલીસ સાથે ગેરવર્તણૂકનો આરોપ

તેમણે આગળ ગંભીર આક્ષેપ લગાવતાં કહ્યું કે બે દિવસ પહેલાં દેશની રાજધાની દિલ્હીના રાજપથ પર કૉંગ્રેસ નેતા રાહુલ ગાંધીએ એક મહિલા પોલીસ અધિકારી સાથે અયોગ્ય વ્યવહાર કર્યો હતો. એટલું જ નહીં, તેમની સાથે પક્ષના નેતા પ્રિયંકા ગાંધી વાડ્રાએ પણ જાહેરમાં મહિલા પોલીસકર્મી પર શારીરિક હુમલો અને ગેરવર્તણૂક કરી હોવાના અહેવાલો સામે આવ્યા છે.

તેમણે ઉમેર્યું કે કૉંગ્રેસ પાર્ટી નૈતિકતા અને મર્યાદા ગુમાવી ચૂકી છે અને દેશની જનતા વિપક્ષના આવા અશોભનીય આચરણને જોઈ રહી છે અને યોગ્ય જવાબ આપશે.