"SIR અંગેના તમામ નિર્ણયો સર્વસંમતિથી લેવાયા, ફોર્મ-૬ બદલાયું નથી!" – ECI એ સોગંદનામામાં ખોલી વિપક્ષના દાવાની પોલ
મુખ્ય ચૂંટણી કમિશનર (CEC) જ્ઞાનેશ કુમારની કામગીરી અને મતદાર યાદી સુધારણા (SIR) વિરુદ્ધ વિપક્ષી પક્ષો દ્વારા સુપ્રીમ કોર્ટમાં દાખલ કરાયેલી અરજી પર ચૂંટણી પંચે (ECI) પોતાનું સત્તાવાર સોગંદનામું રજૂ કર્યું છે. ચૂંટણી પંચે અરજીને નકારી કાઢતાં સ્પષ્ટ કર્યું છે કે વિપક્ષની આ અરજી સંપૂર્ણપણે માત્ર એક અખબારી અહેવાલ (ન્યૂઝ રિપોર્ટ) પર આધારિત છે. પંચે સીઈસીને પદ પરથી હટાવવા કે તેમની કામગીરી રોકવાની વિરોધ પક્ષોની માંગનો સખત વિરોધ કર્યો છે.
ચૂંટણી પંચના સોગંદનામાના મુખ્ય અંશો
ચૂંટણી પંચે જણાવ્યું કે આ સોગંદનામું પંચના ત્રણેય સભ્યોની સંમતિથી દાખલ કરાયું છે. સ્પેશિયલ ઇન્ટેન્સિવ રિવિઝન (SIR) સંબંધિત તમામ આદેશો સર્વસંમતિથી પસાર કરવામાં આવ્યા હતા. ફાઇલ પર સીઈસી કે અન્ય ચૂંટણી કમિશનરો દ્વારા નોંધાયેલી ટિપ્પણી કે સૂચનોને પંચનો આખરી નિર્ણય ગણી શકાય નહીં.
ફોર્મ-૬ માં કોઈ સુધારો કરાયો નથી
પંચે સ્પષ્ટતા કરી કે ફોર્મ-૬ માં કોઈ પણ પ્રકારનો ફેરફાર કરવામાં આવ્યો નથી, કારણ કે તેમાં સુધારો કરવાનો કાનૂની અધિકાર ફક્ત કેન્દ્ર સરકાર પાસે છે. SIR માટે મતદારો પાસેથી લેવામાં આવતું સ્વઘોષણા પત્ર (Declaration Form) એક અલગ દસ્તાવેજ છે. ઓનલાઇન ફોર્મ જોઈને ગેરસમજ ન થાય તે માટે ૨૧ ઓક્ટોબરથી ઓનલાઇન અરજીમાં પણ ફોર્મ-૬ અને ડિક્લેરેશન ફોર્મને કાગળના ફોર્મની જેમ અલગ-અલગ કરી દેવામાં આવ્યા છે.
મતદારોને રૂબરૂ બોલાવવા જરૂરી નથી
જે મતદારોના નામ જૂના રેકોર્ડ સાથે મેળ ખાતા નથી, તેમને સુનાવણી માટે બોલાવવા જરૂરી નથી. બૂથ લેવલ ઓફિસર (BLO) જાતે તેમના ઘરે જઈને જરૂરી દસ્તાવેજો એકઠા કરશે. સુનાવણી ફક્ત વિશેષ સંજોગોમાં જ થશે અને જ્યાં શક્ય હોય ત્યાં તે ઓનલાઇન માધ્યમથી હાથ ધરાશે.
નિયમોની ચકાસણી માટે IIT નિષ્ણાતોની સમિતિ
ચૂંટણી પંચે કોર્ટને માહિતી આપી હતી કે ઇલેક્ટોરલ રજીસ્ટ્રેશન ઓફિસર (ERO) ના આદેશ વિના કોઈ પણ મતદારનું નામ ઉમેરવામાં કે હટાવવામાં આવતું નથી. સમગ્ર સિસ્ટમમાં નિયમોના પાલનની તકનીકી ચકાસણી માટે IIT નિષ્ણાતોની સમિતિ પણ બનાવવામાં આવી છે.
પંચે સોગંદનામામાં એમ પણ સ્પષ્ટ કર્યું કે કોઈ પણ આંતરિક નોટ કે ફાઇલ મીડિયામાં લીક કરવામાં આવી નથી કે ન તો તેની કોઈ મંજૂરી અપાઈ હતી. પંચે હાલ સંક્ષિપ્ત જવાબ રજૂ કર્યો છે અને વિગતવાર જવાબ આપવા માટે સુપ્રીમ કોર્ટ સમક્ષ વધારાનો સમય માંગ્યો છે.
