ભારતીય નૌકાદળને મળશે 8 આધુનિક યુદ્ધજહાજ, ₹53,866 કરોડના કરાર પર હસ્તાક્ષર

ભારતીય નૌકાદળ (Indian Navy)ની દરિયાઈ સુરક્ષા અને યુદ્ધક્ષમતા વધારવા માટે સંરક્ષણ મંત્રાલયે (Ministry of Defence) મોટો નિર્ણય લીધો છે. સોમવાર, 2 નવેમ્બર, 2026ના રોજ મંત્રાલયે આઠ નવી પેઢીનાં યુદ્ધજહાજો (Next Generation Corvettes - NGCs) બનાવવા માટે ₹53,866.50 કરોડના કરારો પર હસ્તાક્ષર કર્યા છે. આ કરાર બે સરકારી જહાજ નિર્માણ કંપનીઓ સાથે કરવામાં આવ્યા છે.

 

કઈ કંપની બનાવશે કેટલાં યુદ્ધજહાજ?

આ પ્રોજેક્ટ હેઠળ કોલકાતાની ગાર્ડન રીચ શિપબિલ્ડર્સ એન્ડ એન્જિનિયર્સ લિમિટેડ (Garden Reach Shipbuilders & Engineers - GRSE) પાંચ યુદ્ધજહાજોનું નિર્માણ કરશે. જ્યારે ગોવા શિપયાર્ડ લિમિટેડ (Goa Shipyard Limited - GSL) બાકીનાં ત્રણ યુદ્ધજહાજો બનાવશે. નવી દિલ્હીના કર્તવ્ય ભવન-2 ખાતે સંરક્ષણ સચિવ રાજેશ કુમાર સિંહની હાજરીમાં આ કરારો પર હસ્તાક્ષર કરવામાં આવ્યા હતા. આ પ્રોજેક્ટની ખાસિયત એ છે કે યુદ્ધજહાજોની ડિઝાઇન ભારતીય નૌકાદળ દ્વારા સ્વદેશી રીતે તૈયાર કરવામાં આવશે અને સ્પર્ધાત્મક પ્રક્રિયા દ્વારા પસંદ કરાયેલી સરકારી સંરક્ષણ કંપનીઓ તેનું નિર્માણ કરશે.

 

આધુનિક મિસાઇલ અને સેન્સરથી સજ્જ હશે જહાજો

આઠેય યુદ્ધજહાજોમાં અદ્યતન મિસાઇલ સિસ્ટમ (Advanced Missile Systems), આધુનિક શસ્ત્રો અને અત્યાધુનિક સેન્સર સિસ્ટમ (Sensor Suites) લગાવવામાં આવશે. આ જહાજો હવાઈ, સપાટી અને પાણીની અંદરથી ઊભા થતા જોખમોનો સામનો કરવામાં સક્ષમ હશે. આ યુદ્ધજહાજોનો ઉપયોગ દુશ્મનનાં જહાજો સામેની કાર્યવાહી, સબમરીન વિરોધી કામગીરી (Anti-Submarine Warfare), દરિયાકાંઠાની સુરક્ષા, દરિયાઈ દેખરેખ (Maritime Surveillance) અને મહત્ત્વના વેપારી દરિયાઈ માર્ગોની સુરક્ષા માટે કરવામાં આવશે.

રોજગારીની નવી તકો ઊભી થશે

આ પ્રોજેક્ટથી દેશના સંરક્ષણ ઉત્પાદન ક્ષેત્રને પણ મોટો ફાયદો થવાની અપેક્ષા છે. આગામી દસ વર્ષમાં જહાજ નિર્માણ એકમોમાં આશરે 72 લાખ માનવ-દિવસની રોજગારી અને સહાયક ઉદ્યોગો તથા સૂક્ષ્મ, લઘુ અને મધ્યમ ઉદ્યોગો (MSMEs)માં આશરે 460 લાખ માનવ-દિવસની રોજગારી ઊભી થવાની શક્યતા છે.

 

આત્મનિર્ભર ભારતને મળશે વેગ

આ પ્રોજેક્ટ 'મેક ઇન ઇન્ડિયા' (Make in India) અને આત્મનિર્ભર ભારત (Atmanirbhar Bharat) અભિયાનને વધુ મજબૂત બનાવશે. સ્વદેશી સામગ્રી, ભારતીય ટેક્નોલોજી અને સ્થાનિક કુશળતાના ઉપયોગથી વિદેશી સાધનો પરની નિર્ભરતા ઘટાડવામાં મદદ મળશે. આઠ આધુનિક યુદ્ધજહાજો નૌકાદળમાં સામેલ થયા બાદ ભારતની દરિયાઈ સરહદો, વેપારી માર્ગો અને વ્યૂહાત્મક હિતોની સુરક્ષામાં વધારો થવાની અપેક્ષા છે. આ કરાર દેશની સંરક્ષણ ક્ષમતા અને સ્વદેશી જહાજ નિર્માણ ઉદ્યોગ માટે મહત્ત્વપૂર્ણ પગલું માનવામાં આવે છે.