"ફટાકડા ફૂટશે તો પ્રદૂષણ વધશે જ!" દિલ્હી-NCRમાં ફટાકડા ફોડવા અને પ્રદૂષણ મુદ્દે સુપ્રીમ કોર્ટની કડક ટિપ્પણી
તહેવારો દરમિયાન દિલ્હી-NCRમાં ફટાકડા ફોડવા અને તેના કારણે વાયુ ગુણવત્તા સૂચકાંક (AQI) પર પડતી વિપરીત અસર અંગેની સુઓ મોટો (સ્વતઃ સંજ્ઞાન) અરજી પર સુનાવણી કરતા સુપ્રીમ કોર્ટે મૌખિક રીતે અત્યંત મહત્વનું અવલોકન કર્યું છે. કોર્ટે સ્પષ્ટ શબ્દોમાં જણાવ્યું હતું કે જો ફટાકડા ફોડવામાં આવશે, તો દિલ્હી-NCR વિસ્તારમાં વાયુ પ્રદૂષણમાં વધારો થવો નિશ્ચિત છે.
જસ્ટિસ એમ. એમ. સુંદરેશ અને જસ્ટિસ પી. બી. વરાળેની ખંડપીઠે સુનાવણી દરમિયાન ટિપ્પણી કરી હતી કે, "દેખીતી વાત છે કે જ્યારે તમે ફટાકડા ફોડો છો, ત્યારે કહેવાની જરૂર નથી કે પ્રદૂષણ વધવાનું જ છે."
સુપ્રીમ કોર્ટની આ ટિપ્પણી ત્યારે સામે આવી જ્યારે અદાલતમાં નિયુક્ત 'એમિકસ ક્યુરી' (Amicus Curiae) એ દલીલ કરી હતી કે ગત વર્ષે તંત્ર દ્વારા ફટાકડા ફોડવામાં અપાયેલી આંશિક છૂટછાટનું કોઈ સંપૂર્ણ મૂલ્યાંકન કરવામાં આવ્યું નથી. તેમણે કોર્ટ સમક્ષ ધ્યાન દોર્યું કે માત્ર 'ગ્રીન ફટાકડા'ને જ મંજૂરી હોવા છતાં પ્રતિબંધિત ફટાકડા મોટા પાયે ફોડવામાં આવ્યા હતા અને નિયમોના ઉલ્લંઘન અંગે એન્ફોર્સમેન્ટ ટીમો સચોટ માહિતી આપવામાં નિષ્ફળ રહી છે.
આ દલીલો સાંભળ્યા બાદ ખંડપીઠે એમિકસ ક્યુરીને પૂછ્યું હતું કે, "તો શું તમારું કહેવું એવું છે કે આ સંપૂર્ણપણે બંધ (ફટાકડા પર સંપૂર્ણ પ્રતિબંધ) થવું જોઈએ?"
