“B****y S**t”: J&Kમાં વર્ચ્યુઅલ મીટિંગ દરમિયાન મહિલા સહકર્મી સાથે IAS અધિકારીએ કરી ગાળાગાળી!

જમ્મુ-કાશ્મીરમાં એક વરિષ્ઠ ભારતીય વહીવટી સેવા (IAS) અધિકારી મોટો વિવાદ સર્જાયા બાદ ચર્ચામાં આવ્યા છે. એક સત્તાવાર વર્ચ્યુઅલ બેઠક દરમિયાન તેમણે જમ્મુ-કાશ્મીર વહીવટી સેવા (JKAS)ની મહિલા અધિકારી સાથે કથિત રીતે ગાળાગાળી કરી હોવાનો વીડિયો સોશિયલ મીડિયા પર વાયરલ થયો છે. આ ઘટનાને પગલે ભારે રોષ જોવા મળી રહ્યો છે.

સંબંધિત અધિકારીની ઓળખ કુમાર રાજીવ રંજન તરીકે થઈ છે, જેઓ જમ્મુ-કાશ્મીરના શ્રમ અને રોજગાર વિભાગના સચિવ છે. જ્યારે મહિલા અધિકારીની ઓળખ બિનીશ વાની તરીકે થઈ છે. તેઓ રોજગાર વિભાગમાં સહાયક નિયામક (Assistant Director, Employment) તરીકે ફરજ બજાવે છે.

સૂત્રોના જણાવ્યા અનુસાર, આ ઘટના મિશન યુવા (Mission YUVA)ની સમીક્ષા બેઠક દરમિયાન બની હતી. આ બેઠકનો હેતુ રાષ્ટ્રીય ગ્રામીણ આજીવિકા મિશન (NRLM) યોજના હેઠળ ચાલી રહેલી કામગીરીની પ્રગતિની સમીક્ષા કરવાનો હતો.

સોશિયલ મીડિયા પર વ્યાપક રીતે પ્રસારિત થઈ રહેલા વીડિયોમાં રાજીવ રંજન ગુસ્સે થઈને બિનીશ વાની પર બૂમો પાડતા સંભળાય છે. આરોપ છે કે તેમણે મહિલા અધિકારી માટે “B****y S**t” જેવા અપમાનજનક શબ્દોનો ઉપયોગ કર્યો હતો. આ ઉપરાંત, તેઓ “હું તમારો બોસ છું” (I am your boss) એવું કહેતા પણ સંભળાય છે.

મહિલા અધિકારીએ શું કહ્યું?

સંપર્ક કરવામાં આવતાં બિનીશ વાનીએ આ ઘટના બની હોવાની પુષ્ટિ કરી હતી. તેમણે સ્પષ્ટતા કરી હતી કે વીડિયો સાથે કોઈ ચેડાં કરવામાં આવ્યાં નથી અને તે આર્ટિફિશિયલ ઇન્ટેલિજન્સ (AI) દ્વારા બનાવવામાં આવ્યો નથી.

વાનીએ જણાવ્યું કે તેમના પગમાં ફ્રેક્ચર થયું હોવા છતાં અને તેઓ રજા પર હોવા છતાં ઘરે બેઠાં વર્ચ્યુઅલ માધ્યમથી બેઠકમાં જોડાયાં હતાં.

તેમણે કહ્યું, “મહિલાની ગરિમાનું રક્ષણ થવું જોઈએ. કોઈ પણ વ્યક્તિ અમારી સાથે આ રીતે વર્તન કરી શકે નહીં.”

IAS અધિકારીએ શું સ્પષ્ટતા કરી?

આ મામલે રાજીવ રંજનને પૂછવામાં આવતાં તેમણે કહ્યું કે જો ગુસ્સાની સ્થિતિમાં તેમના મોઢેથી કંઈક કહેવાઈ ગયું હોય તો તેમને તેનો અફસોસ છે.

તેમણે દાવો કર્યો કે મહિલા અધિકારીને વારંવાર શાંત રહેવા કહેવા છતાં તેઓ તેમને ઉશ્કેરતાં રહ્યાં હતાં.

રંજનએ સવાલ કર્યો કે જો અધિકારીઓને પ્રશ્ન પણ ન પૂછવામાં આવે, તો સમીક્ષા બેઠકો કેવી રીતે યોજી શકાય અને જવાબદારી કેવી રીતે નક્કી કરી શકાય?

તેમણે એવો પણ આરોપ લગાવ્યો કે બિનીશ વાનીએ તેમની સાથે “Hell with you” જેવા શબ્દોનો ઉપયોગ કર્યો હતો.

રંજનએ કહ્યું કે જ્યારે કોઈ જુનિયર અધિકારી પોતાના વરિષ્ઠ અધિકારી સાથે આવી ભાષામાં વાત કરે, ત્યારે વહીવટી અધિકારીઓ વચ્ચેની પદક્રમની વ્યવસ્થા (Hierarchy) કેવી રીતે કાર્ય કરશે? તેમણે સમગ્ર ઘટનાનો સંદર્ભ સમજવા માટે એક કલાકની સંપૂર્ણ બેઠકનો વીડિયો જોવા અને માત્ર પસંદગીના ભાગોના આધારે નિષ્કર્ષ પર ન પહોંચવાની અપીલ કરી.

શ્રમ અને રોજગાર વિભાગે જાહેર કર્યું નિવેદન

આ ઘટના બાદ જમ્મુ-કાશ્મીરના શ્રમ અને રોજગાર વિભાગે સોશિયલ મીડિયા પર ફરતી ક્લિપ્સ અંગે સ્પષ્ટતા જાહેર કરી હતી.

વિભાગે જણાવ્યું કે સત્તાવાર કામગીરી દરમિયાન પરસ્પર સન્માન, શિસ્ત અને વ્યાવસાયિક મર્યાદા (Professional Decorum) જાળવવી અનિવાર્ય છે. તમામ અધિકારીઓ અને કર્મચારીઓએ પોતાની ફરજ બજાવતી વખતે વરિષ્ઠ અધિકારીઓ પ્રત્યે યોગ્ય સન્માન જાળવવું જોઈએ.

વિભાગે એમ પણ કહ્યું કે ઉશ્કેરણીજનક ટિપ્પણીઓ અને અયોગ્ય ભાષા માટે વહીવટી કામગીરીમાં કોઈ સ્થાન નથી. સરકારી વ્યવહારમાં પરસ્પર સન્માન, સંયમ અને સંસ્થાકીય ગરિમા જળવાઈ રહેવી જોઈએ.

બેઠકને લઈને સર્જાયેલી પરિસ્થિતિ અંગે અફસોસ વ્યક્ત કરતાં વિભાગે કહ્યું કે કેટલાક સોશિયલ મીડિયા હેન્ડલ દ્વારા બેઠકના સંપૂર્ણ સંદર્ભ વિના પસંદગીની સંપાદિત ક્લિપ્સ પ્રસારિત કરવામાં આવી રહી છે, જે ચિંતાનો વિષય છે. વિભાગે આ ક્લિપ્સને અચકાસેલી ગણાવી અને ચેતવણી આપી કે આંતરિક વહીવટી ચર્ચાઓનું પસંદગીપૂર્વક સંપાદન સમગ્ર ઘટનાની ભ્રામક છાપ ઊભી કરી શકે છે.

વિભાગે અંતમાં જણાવ્યું કે આ મામલે લાગુ પડતા નિયમો અને કાયદાકીય જોગવાઈઓ અનુસાર જરૂરી કાર્યવાહી કરીને તેને તાર્કિક અંત સુધી લઈ જવામાં આવશે.