લવ જેહાદના કેસમાં નવા કાયદામાં કેટલા વર્ષની થશે સજા? જાણો વિગત

દેશમાં 'લવ જેહાદ'ના કિસ્સાઓને લઈને ઘણી ચર્ચા થઈ રહી છે. આવા મામલાઓનો સામનો કેવી રીતે કરવો તે અંગે પણ વાત કરવામાં આવી છે. પરંતુ હવે ભારતીય ન્યાયિક સંહિતામાં આ અંગે કાયદો બનાવવામાં આવ્યો છે. જેના પગલે લવ જેહાદ જેવા મામલાઓ પર કાર્યવાહી કરવામાં સરળતા રહેશે અને નિર્ધારિત કાયદાકીય પ્રક્રિયા મુજબ કાર્યવાહી કરી શકાશે. હવે ધાર્મિક ઓળખ છુપાવીને લગ્ન કરવાના કેસમાં ભારતીય ન્યાય સંહિતા હેઠળ 10 વર્ષની સજા થશે. ભારતીય ન્યાયિક સંહિતાની કલમ 69માં ઉલ્લેખ કરવામાં આવ્યો છે. 

બળાત્કારના કેસમાં ઓછામાં ઓછી 10 વર્ષની સજા  

જ્યારે બળાત્કારના કેસમાં અત્યાર સુધી કલમ 376 હેઠળ કાર્યવાહી કરવામાં આવતી હતી અને કલમ 375માં બળાત્કારની વ્યાખ્યા નક્કી કરવામાં આવી હતી. હવે ભારતીય ન્યાયિક સંહિતાની કલમ 63માં બળાત્કારની વ્યાખ્યા નક્કી કરવામાં આવી છે અને કલમ 64માં તેના માટે સજાની જોગવાઈ છે. બળાત્કારના કેસમાં ગુનેગાર માટે ઓછામાં ઓછી 10 વર્ષની સજા છે અને તેને આજીવન કેદ સુધી વધારી શકાય છે. કલમ 70(2)માં સગીર સાથે બળાત્કારની સજા નક્કી કરવામાં આવી છે. 16 વર્ષથી ઓછી ઉંમરની બાળકી પર બળાત્કારની સજા વધારીને 20 વર્ષ કરવામાં આવી છે. સગીર પર બળાત્કાર કરવા બદલ મૃત્યુદંડની જોગવાઈ પણ છે. 12 વર્ષથી ઓછી ઉંમરની સગીર સાથે બળાત્કાર કરવા માટે ઓછામાં ઓછી 20 વર્ષની જેલ અથવા મૃત્યુદંડની સજા થશે. આ અંગે સુપ્રીમ કોર્ટના એડવોકેટ રુદ્ર વિક્રમ સિંહે પણ તેમના પુસ્તક 'દંડ સંહિતા સે ન્યાય સંહિતા તક'માં વિસ્તૃત માહિતી આપી છે. 

ભારતીય ન્યાય સંહિતા લાગુ થવાથી તમામ કેસ ઝડપથી ઉકેલાઈ જશે - એડવોકેટ રુદ્ર વિક્રમ

'દંડ સંહિતા સે ન્યાય સંહિતા તક'મા એડવોકેટ રુદ્ર વિક્રમે લખ્યું છે કે, 'ભારતીય ન્યાય સંહિતા લાગુ થવાથી તમામ કેસ ઝડપથી ઉકેલાઈ જશે. આ અંતર્ગત ત્રણ વર્ષથી ઓછી સજાવાળા કેસમાં સમરી ટ્રાયલ ચલાવવામાં આવશે. હવે મેજિસ્ટ્રેટ ત્રણ વર્ષથી ઓછી સજાવાળા કેસમાં સમરી ટ્રાયલ ચલાવી શકશે. આ અંતર્ગત પોલીસે 90 દિવસમાં ચાર્જશીટ દાખલ કરવી પડશે. સંજોગોના આધારે કોર્ટ 90 દિવસનો વધુ સમય આપી શકે છે. આ રીતે, 180 દિવસમાં એટલે કે છ મહિનામાં પોલીસમાં ચાર્જશીટ દાખલ કરવી પડશે જેથી ટ્રાયલ શરૂ થઈ શકે.