ચૂંટણી પંચે પવન ખેડાને નોટિસ મોકલી: બે EPIC નંબરને લઇને કાર્યવાહી; ભાજપે લગાવ્યો હતો ગંભીર આરોપ

બિહારમાં વિધાનસભા ચૂંટણી પહેલા કોંગ્રેસના નેતા રાહુલ ગાંધી સતત ભાજપ પર વોટ ચોરીના મુદ્દે ઘેરી રહ્યા છે. હવે ભાજપે કોંગ્રેસ નેતા પવન ખેડા પર બે વોટર ID કાર્ડ રાખવાનો આરોપ લગાવ્યો છે. ચૂંટણી પંચે પવન ખેડાને નોટિસ ફટકારી જવાબ માંગ્યો છે.

પવન ખેડા પાસે બે EPIC નંબર હોવાનો ભાજપનો દાવો

મહત્ત્વપૂર્ણ છે કે ભારતીય જનતા પાર્ટી (BJP)ના IT સેલના પ્રમુખ અમિત માલવીયે વોટ ચોરી પર કોંગ્રેસ પર પલટવાર કરતા પવન ખેડા પર ગંભીર આરોપ લગાવ્યો હતો. અમિત માલવીયાએ દાવો કર્યો હતો કે પવન ખેડાએ બે ચૂંટણી વિસ્તારમાં મતદાર યાદીમાં પોતાનું રજિસ્ટ્રેશન કરાવી રાખ્યુ છે આ સાથે પવન ખેડાના બે ઓળખ પત્ર નંબર પણ શેર કરવામાં આવ્યા છે જેમાંથી એક નંબર જંગપુરા વિધાનસભા વિસ્તાર અને બીજો નવી દિલ્હી વિધાનસભા વિસ્તારમાં છે. 

તેજસ્વી યાદવ સહિતના નેતાઓ પાસે બે EPIC નંબરને લઇને થયો હતો વિવાદ

ચૂંટણી પંચે પ્રથમ વખત કોઇને નોટિસ ફટકારી નથી. આ પહેલા તેજસ્વી યાદવ, વિજય કુમાર સિન્હા, રેણુ દેવી જેવા નેતાઓ પાસે પણ બે-બે વોટર આઇડી કાર્ડ મળ્યા હતા. ચૂંટણી પંચે આ તમામ લોકોને નોટિસ મોકલીને જવાબ માંગ્યો હતો. Representation of Peoples Act 1951, Section 62, Subclause 2 એમ કહે છે કે કોઇ પણ વ્યક્તિ એક કરતા વધારે વિધાનસભામાં મત નાખી શકતો નથી.