મહાદેવ બેટિંગ એપના પ્રમોટર સૌરભ ચંદ્રાકરની EDએ કરી ધરપકડ, 7 દિવસના રિમાન્ડ પર મોકલાયો
મહાદેવ ઓનલાઈન બુક ગેરકાયદેસર બેટિંગ સિન્ડિકેટના સહ-માલિક અને પ્રમોટર સૌરભ ચંદ્રાકરની ED દ્વારા ધરપકડ કરવામાં આવી છે. EDએ 13.11.2026ના રોજ પ્રિવેન્શન ઓફ મની લોન્ડરિંગ એક્ટ (PMLA)-2002ની કલમ 19 હેઠળ આ કાર્યવાહી કરી હતી. રાયપુરની વિશેષ કોર્ટે સૌરભ ચંદ્રાકરને પૂછપરછ માટે 19.11.2026 સુધી એટલે કે 7 દિવસની ED કસ્ટડીમાં મોકલી આપ્યો છે. આ સિન્ડિકેટનો તે પ્રથમ પ્રમોટર છે જેને ભારત પરત લાવવામાં આવ્યો છે.
દુબઈથી ચાલતું હતું ગેરકાયદેસર બેટિંગ નેટવર્ક
EDની તપાસ મુજબ, સૌરભ ચંદ્રાકર અને તેનો અન્ય સાથી પ્રમોટર રવિ ઉપ્પલ દુબઈ સ્થિત મુખ્ય મથકથી મહાદેવ ઓનલાઈન બુક નામની અનેક ગેરકાયદેસર ઓનલાઈન બેટિંગ વેબસાઈટ્સ ચલાવતા હતા. આ માટે ભારત અને સંયુક્ત આરબ અમીરાત (UAE)માં બેટિંગ પેનલની ફ્રેન્ચાઈઝી બનાવવામાં આવી હતી. આ પ્લેટફોર્મ પર ખેલાડીઓ પાસેથી મળતી રકમ અન્ય લોકોના નામે ખોલાયેલા બેંક ખાતાઓમાં જમા કરવામાં આવતી હતી અને ત્યારબાદ હવાલા મારફતે ભારતની બહાર મોકલવામાં આવતી હતી.
દર મહિને અંદાજે 450 કરોડ રૂપિયાની કમાણી
EDએ 20.10.2023ના રોજ દાખલ કરેલી તેની મુખ્ય ફરિયાદમાં આ બેટિંગ સિન્ડિકેટની દર મહિનાની કમાણી અંદાજે 450 કરોડ રૂપિયા આંકી હતી.
સમન્સથી બચતો રહ્યો સૌરભ, ઈન્ટરપોલે જારી કરી હતી રેડ નોટિસ
EDના જણાવ્યા અનુસાર, સપ્ટેમ્બર 2023માં સમન્સ જારી થવા છતાં સૌરભ ચંદ્રાકર તપાસ એજન્સી સમક્ષ હાજર થયો નહોતો અને સતત તપાસથી બચતો રહ્યો હતો. EDની અરજી પર વિશેષ PMLA કોર્ટે 04.09.2023ના રોજ તેની સામે બિન-જામીનપાત્ર વોરંટ જારી કર્યું હતું, જેના પગલે EDની વિનંતી પર ઈન્ટરપોલે પણ તેની સામે રેડ નોટિસ જારી કરી હતી.
હાઈકોર્ટમાં અરજી ફગાવાઈ, વાનુઆતુનો પાસપોર્ટ મેળવ્યો
સૌરભે આ વોરંટને છત્તીસગઢ હાઈકોર્ટમાં પડકાર્યું હતું, પરંતુ 22.03.2025ના રોજ તેની અરજી ફગાવી દેવામાં આવી હતી. તપાસમાં સામે આવ્યું કે ભારતીય પાસપોર્ટ હોવા છતાં તેણે વાનુઆતુનો પાસપોર્ટ મેળવ્યો હતો. તેણે વિશેષ કોર્ટમાં એવો દાવો પણ કર્યો હતો કે 28.06.2022ના રોજ તેણે ભારતીય નાગરિકતા છોડી દીધી હતી.
ઓમાનની કોર્ટે ભારત પ્રત્યાર્પણનો આપ્યો આદેશ
EDએ સૌરભને ભારત પરત લાવવા માટે ભારત અને ઓમાન વચ્ચેની પ્રત્યાર્પણ સંધિ હેઠળ કાર્યવાહી કરી હતી. વિશેષ કોર્ટ મારફતે ઓમાનને પ્રત્યાર્પણની વિનંતી મોકલવામાં આવી હતી, જેના આધારે 08.10.2026ના રોજ મસ્કતની અપીલ કોર્ટે તેના ભારત પ્રત્યાર્પણનો આદેશ આપ્યો હતો.
નકલી દસ્તાવેજો સાથે એરપોર્ટ પરથી ઝડપાયો
ભારતીય દૂતાવાસ તરફથી સૌરભની ભારતીય નાગરિકતાની પુષ્ટિ થયા બાદ ઓમાનની કોર્ટે નાગરિકતા છોડવા અંગેની તેની દલીલ ફગાવી દીધી હતી. કોર્ટના રેકોર્ડ મુજબ, તેને મસ્કત ઈન્ટરનેશનલ એરપોર્ટ પરથી નકલી મુસાફરી દસ્તાવેજો દ્વારા બહાર જવાનો પ્રયાસ કરતી વખતે ઝડપી લેવામાં આવ્યો હતો.
CBIની ટીમ મસ્કતથી ભારત લઈ આવી
ત્યારબાદ CBIની ટીમ 01.11.2026ના રોજ તેને મસ્કતથી ભારત લઈ આવી હતી. EDએ આ સમગ્ર કાર્યવાહીમાં સહયોગ બદલ ઓમાનના અધિકારીઓનો આભાર માન્યો છે.
અત્યાર સુધીમાં 3,500 કરોડ રૂપિયાની સંપત્તિ એટેચ
મહાદેવ બેટિંગ એપ કેસમાં ED અત્યાર સુધીમાં અંદાજે 190 સ્થળો પર દરોડા પાડી ચૂકી છે. તપાસ દરમિયાન લગભગ 2,000 કરોડ રૂપિયા જપ્ત અથવા ફ્રીઝ કરવામાં આવ્યા છે, જ્યારે અંદાજે 3,500 કરોડ રૂપિયાની સંપત્તિ એટેચ કરવામાં આવી છે. આમાં વિદેશમાં આવેલી અંદાજે 1,800 કરોડ રૂપિયાની સંપત્તિનો પણ સમાવેશ થાય છે, ઉપરાંત દુબઈમાં 22 સ્થાવર મિલકતો પણ એટેચ કરાઈ છે.
સૌરભ ચંદ્રાકર કેસમાં ધરપકડ કરાયેલો 15મો આરોપી
ED આ કેસમાં અત્યાર સુધીમાં 116 આરોપીઓ સામે 6 પ્રોસિક્યુશન ફરિયાદો દાખલ કરી ચૂકી છે. સૌરભ ચંદ્રાકર આ સમગ્ર કેસમાં ED દ્વારા ધરપકડ કરાયેલો 15મો આરોપી છે.
બેટિંગની કમાણીથી અમેરિકન કંપની ખરીદવાનો આરોપ
EDએ તેની તપાસમાં બેટિંગ પેનલ સંચાલકોથી લઈને દુબઈ સ્થિત મુખ્ય મથક, હવાલા સંચાલકો અને શેરબજારમાં રોકાણ કરનારાઓ સુધીના નાણાકીય વ્યવહારો શોધી કાઢ્યા છે.
અમેરિકન કંપની એબિક્સ ઈન્ક.ના અધિગ્રહણમાં વપરાયા નાણાં
સપ્ટેમ્બર 2023માં EDએ દુબઈની કંપનીઓ પાસે રહેલી અંદાજે 236 કરોડ રૂપિયાની સિક્યોરિટીઝ ફ્રીઝ કરી હતી. જુલાઈ 2026માં EDએ વિકાસ ગર્ગની ધરપકડ કરી હતી, જેની કંપનીઓમાં બેટિંગથી કમાયેલા લગભગ 940 કરોડ રૂપિયા પહોંચ્યા હતા. આમાંથી અંદાજે 766 કરોડ રૂપિયાનો ઉપયોગ અમેરિકન કંપની એબિક્સ ઈન્ક. (Ebix Inc.)ના અધિગ્રહણમાં કરવામાં આવ્યો હતો. આ કેસ સાથે જોડાયેલા હિસ્સામાં ED અંદાજે 941 કરોડ રૂપિયાની સંપત્તિ એટેચ કરી ચૂકી છે.
દુબઈમાં લગ્ન પાછળ ખર્ચ્યા હતા અંદાજે 200 કરોડ રૂપિયા
EDની તપાસમાં સૌરભ ચંદ્રાકરના ફેબ્રુઆરી 2023માં રાસ અલ ખૈમાહમાં થયેલા શાહી લગ્નની વિગતો પણ સામે આવી હતી. આ લગ્ન પાછળ અંદાજે 200 કરોડ રૂપિયા રોકડા ખર્ચવામાં આવ્યા હોવાનું અનુમાન છે, જેમાં નાગપુરથી 3 ચાર્ટર્ડ વિમાનો દ્વારા મહેમાનોને દુબઈ લઈ જવામાં આવ્યા હતા.
આંગડિયા પેઢીઓ અને હોટેલ મારફતે થઈ હતી નાણાકીય લેવડદેવડ
EDએ કાર્યક્રમનું આયોજન કરનારી કંપની, હોટેલ અને આંગડિયા પેઢીઓ મારફતે થયેલા આ રકમના વ્યવહારો શોધી કાઢ્યા હતા. તપાસ એજન્સીને મળેલા મહેમાનોના રેકોર્ડ પરથી સિન્ડિકેટના મેનેજમેન્ટ સાથે જોડાયેલા લોકોની ઓળખ પણ થઈ હતી.
ડિજિટલ ડેટા અને વિદેશી કંપનીઓના દસ્તાવેજોની તપાસ
EDની કસ્ટડીમાં સૌરભ ચંદ્રાકરની તેના સાથીદારોના નિવેદનો, ડિજિટલ ડેટા અને વિદેશી કંપનીઓ સાથે જોડાયેલા દસ્તાવેજોના આધારે પૂછપરછ કરવામાં આવશે. તપાસ એજન્સી મની લોન્ડરિંગ સંબંધિત પુરાવાઓ સામે રાખીને પણ તેની પાસેથી સત્ય ઓકાવવાનો પ્રયાસ કરશે.
