Video: પોતાની જાત સાથે જૂઠું ન બોલો...' રાહુલ ગાંધીના નિવેદનો પર કેન્દ્રીય મંત્રી કિરેન રિજિજુનો આકરો પલટવાર, આપી આ બે મોટી સલાહ!

કોંગ્રેસ નેતા અને લોકસભામાં વિપક્ષના નેતા રાહુલ ગાંધી દ્વારા અમેરિકા પ્રવાસ દરમિયાન આપવામાં આવેલા નિવેદનોને લઈને દેશનું રાજકારણ ફરી એકવાર ગરમાયું છે. આ મામલે કેન્દ્રીય સંસદીય બાબતોના મંત્રી કિરેન રિજિજુએ રાહુલ ગાંધી પર આકરા પ્રહારો કર્યા છે અને તેમના પર ભારત વિરોધી માનસિકતા ધરાવવાનો ગંભીર આક્ષેપ લગાવ્યો છે.
'વિદેશી શક્તિઓના ઈશારે બોલી રહ્યા છે રાહુલ ગાંધી?'
કેન્દ્રીય મંત્રી કિરેન રિજિજુએ નિવેદન આપતા જણાવ્યું હતું કે, "એવું બની શકે છે કે રાહુલ ગાંધી પોતે જ ભારત વિરુદ્ધ બોલવાનું અને દેશને બદનામ કરવાનું પસંદ કરતા હોય, અથવા તો વિશ્વભરની ભારત વિરોધી શક્તિઓ તેમને ઉશ્કેરી રહી હોય. બંને બાબતો પણ હોઈ શકે છે."
તેમણે વધુમાં આરોપ લગાવ્યો કે, "રાહુલ ગાંધીમાં ભારત અને તેની સભ્યતાને નબળી પાડવાની માનસિકતા વિકસી છે. તેમણે આપણી પરંપરાઓ, મૂળભૂત માન્યતાઓ, ભારતની લોકશાહી અને બંધારણ પર હુમલો કર્યો છે. નહીંતર, વિપક્ષના નેતા દિવસ-રાત ભારતનું અપમાન કરવામાં કેવી રીતે વિતાવી શકે?"
કિરેન રિજિજુએ રાહુલ ગાંધીને આપી બે સલાહ રાહુલ ગાંધીના નિવેદનો પર પ્રતિક્રિયા આપતા કિરેન રિજિજુએ તેમને બે સૂચનો આપ્યા હતા:
-
લોકશાહી અને આઝાદી મુદ્દે: રિજિજુએ કહ્યું કે, "તમે આટલી આઝાદીથી હરો-ફરો છો—જે ઈચ્છો તે કરો છો, ગુપ્ત રીતે વિદેશ પ્રવાસ કરો છો અને દેશમાં મનફાવે તેમ વર્તો છો, અને આ બધાની વચ્ચે સતત વડાપ્રધાન મોદીનું અપમાન કરો છો. આટલી સ્વતંત્રતા મળ્યા પછી પણ કૃપા કરીને એવો દાવો ન કરો કે દેશમાં લોકશાહી નથી અથવા આઝાદી ખતમ થઈ ગઈ છે. મહેરબાની કરીને પોતાની જાત સાથે જૂઠું ન બોલો."
-
ભારતીય અર્થતંત્ર મુદ્દે: ભારતના આર્થિક વિકાસનો ઉલ્લેખ કરતા તેમણે કહ્યું કે, "આજે ભારતનું અર્થતંત્ર એક ઉજ્જવળ અર્થતંત્ર અને આર્થિક વિકાસના સાચા એન્જિન તરીકે ઊભું છે. તેને 'મૃત અર્થતંત્ર' (Dead Economy) ન કહો. ન તો પોતાની જાત સાથે અને ન તો બીજાઓ સાથે જૂઠું બોલો. દેશની પ્રગતિને ઓછી આંકીને અને ભારતને બદનામ કરીને તમે શું મેળવવાની આશા રાખો છો?"
બીજી તરફ, કોંગ્રેસ પક્ષ અને રાહુલ ગાંધી દ્વારા અગાઉ પણ સ્પષ્ટતા કરવામાં આવી છે કે તેમના નિવેદનો દેશ વિરુદ્ધ નહીં પરંતુ સરકારની નીતિઓ અને લોકશાહી સંસ્થાઓની કામગીરી સામે સવાલો ઉઠાવવા માટે હોય છે.













