50 હજાર કરોડ ક્યાં ગયા? 10 વર્ષમાં 80 હજાર કામ છતાં બેંગલુરુના રસ્તા ખાડાઓથી ભરેલા, ટ્રાફિકની સમસ્યા યથાવત્!
બેંગલુરુમાં છેલ્લા એક દાયકામાં લગભગ 80 હજાર નાગરિક સુવિધા સંબંધિત પ્રોજેક્ટ્સ પાછળ અંદાજે 50 હજાર કરોડ રૂપિયાનો ખર્ચ કરવામાં આવ્યો છે. તેમ છતાં શહેર આજે પણ ખાડાવાળા રસ્તા, નબળી ડ્રેનેજ વ્યવસ્થા અને અપૂરતા માળખાકીય સુવિધાઓ જેવી સમસ્યાઓનો સામનો કરી રહ્યું છે. બેંગલુરુ નવ નિર્માણ પાર્ટી (BNP) દ્વારા આક્ષેપ કરવામાં આવ્યો છે કે આટલો મોટો ખર્ચ કરવા છતાં શહેરની સ્થિતિમાં અપેક્ષિત સુધારો થયો નથી.
સોમવારે પાર્ટીએ પોતાના #LekkaBeku અભિયાન હેઠળ BBMPના પ્રોજેક્ટ્સ અને કોન્ટ્રાક્ટ્સનો અપડેટેડ ડેટાબેઝ જાહેર કર્યો હતો. આ સાથે પાર્ટીએ અગાઉની ભાજપ અને કોંગ્રેસ સરકારોની જવાબદારી સામે સવાલો ઉઠાવ્યા હતા. પાર્ટીનો દાવો છે કે જાહેર નાણાંના ખર્ચ અને શહેરમાં તૈયાર થયેલી માળખાકીય સુવિધાઓની ગુણવત્તા વચ્ચે મોટો તફાવત જોવા મળી રહ્યો છે.
પાર્ટીના નાગરિક પોર્ટલ પર ઉપલબ્ધ આ ડેટાબેઝમાં BBMPના તમામ 198 વોર્ડની માહિતી સામેલ છે. તેમાં વિવિધ પ્રોજેક્ટ્સનો ખર્ચ, કોન્ટ્રાક્ટરોની વિગતો, થયેલો ખર્ચ, કામની સ્થિતિ અને પ્રોજેક્ટ પૂર્ણ થયો છે કે નહીં તેની માહિતી આપવામાં આવી છે.
BNPના દાવા અનુસાર, રસ્તાઓ, ફૂટપાથ અને અન્ય નાગરિક માળખાકીય સુવિધાઓ પાછળ પ્રતિ કિલોમીટર 3 કરોડ રૂપિયાથી વધુનો ખર્ચ કરવામાં આવ્યો છે. તેમ છતાં શહેરના અનેક વિસ્તારોમાં રસ્તાઓની હાલત ખરાબ છે. પાર્ટીએ સવાલ ઉઠાવ્યો છે કે આટલો ખર્ચ કર્યા બાદ પણ નાગરિકોને સારી સુવિધાઓ કેમ મળી રહી નથી?
'આટલો ખર્ચ છતાં શહેર મૂળભૂત સમસ્યાઓથી કેમ પીડાઈ રહ્યું છે?'
BNPના સ્થાપક અને મહાસચિવ શ્રીકાંત નરસિમ્હને જણાવ્યું હતું કે, "આ આંકડા એક મૂળભૂત સવાલ ઊભો કરે છે કે જો બેંગલુરુના વિકાસ માટે આટલા મોટા પ્રમાણમાં નાણાં ખર્ચવામાં આવ્યાં છે, તો શહેર આજે પણ પાયાની નાગરિક સમસ્યાઓનો સામનો કેમ કરી રહ્યું છે? ખાડાવાળા રસ્તાઓ પર લોકોનાં મોત થઈ રહ્યાં છે, દર ચોમાસામાં અંડરપાસ મૃત્યુના ફંદા બની જાય છે અને ટ્રાફિક જામને કારણે મુસાફરો દરરોજ કલાકો સુધી રસ્તા પર અટવાઈ રહે છે."
તેમણે આક્ષેપ કર્યો હતો કે કરદાતાઓના નાણાંનો યોગ્ય ઉપયોગ થઈ રહ્યો નથી. સાથે જ નાગરિક પ્રોજેક્ટ્સ અમલમાં મૂકવા માટે જવાબદાર સરકારો અને સરકારી એજન્સીઓ પાસેથી જવાબદારી નક્કી કરવાની માગ કરી હતી.
સરકારી ખર્ચમાં પારદર્શિતા લાવવાનો પ્રયાસ
પાર્ટીએ જણાવ્યું હતું કે આ ડેટાબેઝ તૈયાર કરવાનો મુખ્ય હેતુ નાગરિક સુવિધાઓ પાછળ થતા સરકારી ખર્ચમાં પારદર્શિતા લાવવાનો અને લોકોને જાહેર કામોની તપાસ કરવાની તક આપવાનો છે.
BNPએ માગ કરી છે કે તમામ પ્રોજેક્ટ્સના રેકોર્ડ સરળતાથી ઉપલબ્ધ હોવા જોઈએ. પ્રોજેક્ટને મંજૂરી મળવાથી લઈને કામ પૂર્ણ થવા સુધીની દરેક પ્રક્રિયાનું પારદર્શક રીતે ટ્રેકિંગ થવું જોઈએ. આ ઉપરાંત, જે કામો પાછળ વારંવાર નાણાં ખર્ચવામાં આવે છે તેની પણ યોગ્ય તપાસ થવી જોઈએ.
શ્રીકાંત નરસિમ્હને સરકારી સ્તરે એક સંકલિત અને સરળતાથી ઉપલબ્ધ ડેટાબેઝના અભાવ અંગે પણ સવાલ ઉઠાવ્યો હતો. તેમનું કહેવું છે કે જાહેર નાણાંનો ક્યાં અને કેવી રીતે ખર્ચ થઈ રહ્યો છે તેની માહિતી મેળવવા માટે નાગરિકોએ સ્વતંત્ર સંસ્થાઓ કે પાર્ટીઓના પ્રયાસો પર નિર્ભર રહેવું ન જોઈએ.
