ચંપાઈ સોરેને નવી પાર્ટી બનાવવાનું કર્યું એલાન, હેમંત સામે બળવો કર્યા બાદ લીધો મોટો નિર્ણય
ઝારખંડની રાજનીતિમાં છેલ્લા કેટલાક દિવસથી ભારે હલચલ જોવા મળી હતી. ત્યારે આજે આખરે ઝારખંડના પૂર્વ મુખ્ય
ઝારખંડની રાજનીતિમાં છેલ્લા કેટલાક દિવસથી ભારે હલચલ જોવા મળી હતી. ત્યારે આજે આખરે ઝારખંડના પૂર્વ મુખ્યમંત્રી ચંપાઈ સોરેને નવી પાર્ટી બનાવવાનું એલાન કરી દીધું છે. અગાઉ ચંપાઈ સોરેને તેમના સોશિયલ મીડિયા પ્લેટફોર્મ Xના બાયોમાંથી તેમની પાર્ટી ઝારખંડ મુક્તિ મોરચાનું નામ હટાવી દીધું હતું.
ચંપાઈ સોરેને સોશિયલ મીડિયા પ્લેટફોર્મ X પર એક પોસ્ટ કરી હતી, જેમાં તેમણે પોતાની નારાજગી વ્યક્ત કરી હતી. ચંપાઈ સોરેને પોતાની પોસ્ટમાં લખ્યું કે, છેલ્લા ત્રણ દિવસના અપમાનજનક વર્તનને કારણે હું મારા આંસુ પર કાબૂ રાખવાનો પ્રયાસ કરી રહ્યો હતો, પરંતુ તેમને માત્ર ખુરશીની ચિંતા હતી. મને એવું લાગ્યું કે જાણે એ પક્ષમાં મારું કોઈ અસ્તિત્વ જ નથી, જે પક્ષ માટે અમે આખું જીવન સમર્પિત કર્યું હતું, તે દરમિયાન આવી ઘણી અપમાનજનક ઘટનાઓ બની હતી, જેનો હું અત્યારે ઉલ્લેખ કરવા માંગતો નથી. આટલા અપમાન અને તિરસ્કાર પછી, મને વૈકલ્પિક માર્ગ શોધવાની ફરજ પડી.
ઝારખંડમાં વિધાનસભા ચૂંટણી પહેલા પૂર્વ મુખ્યમંત્રીના એક ટ્વિટથી રાજકીય વર્તુળોમાં ભારે હલચલ જોવા મળી હતી. દરેક જણ વિચારી રહ્યા હતા કે, ચંપાઈનું આગળનું પગલું શું હશે? ત્યારે આજે પૂર્વ સીએમએ જાહેરાત કરી છે કે, તેઓ નવી પાર્ટી બનાવશે. એટલું જ નહીં તેમણે ગઠબંધન માટેના દરવાજા પણ ખુલ્લા રાખ્યા છે.
પૂર્વ સીએમએ કહ્યું, 'હું રાજકારણમાંથી નિવૃત્તિ નહીં લઉં. મેં ત્રણ વિકલ્પ આપ્યા હતા. રિટાયરમેન્ટ, સંગઠન કે દોસ્ત. હું નિવૃત્ત થઈશ નહીં, હું પાર્ટીને મજબૂત કરીશ, નવી પાર્ટી બનાવીશ અને જો કોઈ સારા મિત્ર મળી જશે તો હું તેની સાથે આગળ વધીશ.'
કોણ છે ચંપાઈ સોરેન?
તમને જણાવી દઈએ કે ઝારખંડમાં ચંપાઈ સોરેને ગયા મહિને જુલાઈમાં મુખ્યમંત્રી પદ પરથી રાજીનામું આપી દીધું હતું. આ પછી જેલમાંથી છૂટ્યા બાદ હેમંત સોરેન ફરી એકવાર ઝારખંડના સીએમ બન્યા હતા. ચંપાઈ સોરેન 2 ફેબ્રુઆરી 2024 થી 3 જુલાઈ 2024 સુધી ઝારખંડના મુખ્યમંત્રી હતા. ચંપાઈ સોરેન સાત વખત ધારાસભ્ય રહી ચૂક્યા છે. 2005થી તેઓ સતત સરાઈકેલા વિધાનસભા મતવિસ્તારનું પ્રતિનિધિત્વ કરી રહ્યા છે. 1991માં તેઓ પ્રથમ વખત સરાયકેલા બેઠક પરથી ધારાસભ્ય બન્યા હતા. હેમંત સોરેને 2019માં ચંપાઈ સોરેનને કેબિનેટ મંત્રી પણ બનાવ્યા હતા.
