Video: "CEC જ્ઞાનેશ કુમાર રાજીનામું આપે અને તેમના પર કેસ ચાલે!" રામલીલા મેદાનની રેલી પહેલાં કોંગ્રેસનો જોરદાર હુમલો
દિલ્હીના ઐતિહાસિક રામલીલા મેદાન ખાતે વિપક્ષી ગઠબંધન 'ઈન્ડિયા' (INDIA) દ્વારા યોજાનારી વિશાળ રેલી પૂર્વે રાજકીય વાતાવરણ ગરમાયું છે. તેલંગાણાના કોંગ્રેસ સાંસદ ચામલા કિરણ કુમાર રેડ્ડીએ તૈયારીઓની સમીક્ષા કર્યા બાદ જણાવ્યું હતું કે આ રેલી દેશમાં લોકશાહી અને ચૂંટણી પ્રક્રિયાના રક્ષણ માટે નિર્ણાયક સાબિત થશે.
સાંસદ કિરણ કુમાર રેડ્ડીએ રામલીલા મેદાનની મુલાકાત લીધા બાદ જણાવ્યું કે, તેલંગાણાના તમામ સાંસદો અને વરિષ્ઠ નેતાઓએ સાથે મળીને મેદાનની વ્યવસ્થાઓની સમીક્ષા કરી છે. માત્ર તેલંગાણામાંથી જ અંદાજે ૧૦,૦૦૦ જેટલા કાર્યકરો અને સમર્થકો દિલ્હી પહોંચી રહ્યા છે, જેમના રોકાણ અને બેઠક વ્યવસ્થાની ચકાસણી કરવામાં આવી રહી છે. તેમણે દાવો કર્યો હતો કે આ રેલીમાં સમગ્ર દેશમાંથી ૧.૫ લાખથી વધુ લોકો ઉપસ્થિત રહેશે.
ભાજપ અને કેન્દ્ર સરકાર પર આકરા પ્રહારો કરતાં તેમણે કહ્યું કે, "આ રેલી મારફતે સમગ્ર દેશ જોશે કે ભાજપે 'વોટ ચોરી'ના નામે શું ખેલ ખેલ્યો છે. અમારા નેતા રાહુલ ગાંધીજીની પ્રથમ અને મુખ્ય માંગ એ રહેશે કે મુખ્ય ચૂંટણી કમિશનર (CEC) જ્ઞાનેશ કુમાર પોતાના પદ પરથી તાત્કાલિક રાજીનામું આપે અને તેમના વિરુદ્ધ કાનૂની કાર્યવાહી (Prosecution) ચલાવવામાં આવે. આ સાથે જ વર્ષ ૨૦૨૫ પહેલાંની જે મૂળ મતદાર યાદી હતી તેને ફરીથી પુનઃસ્થાપિત કરવામાં આવે."
કેન્દ્રીય ગૃહમંત્રી અમિત શાહના નિવેદનો પર કટાક્ષ કરતાં કોંગ્રેસ સાંસદે ઉમેર્યું કે, "અમિત શાહ જાહેર સભાઓમાં વારંવાર કહે છે કે તેઓ ૫૦ વર્ષ સુધી સત્તામાં રહેવા માગે છે. તેમનો અંતિમ હેતુ દેશના તમામ વિરોધ પક્ષોને નબળા પાડવાનો છે, પરંતુ અમે તેમનું આ સપનું ક્યારેય પૂરું થવા દઈશું નહીં. અમે કાલે આ જ ઐતિહાસિક મેદાન પરથી આ અન્યાય સામે મક્કમતાથી લડત આપીશું."
