Video: "ભગવંત માન માત્ર કઠપૂતળી, અસલી સરકાર કેજરીવાલ ચલાવે છે!" AAPની યાદી જાહેર થતાં જ સુનીલ જાખડનો મોટો ધડાકો

પંજાબ વિધાનસભા ચૂંટણી માટે આમ આદમી પાર્ટી (AAP) દ્વારા 40 ઉમેદવારોની પ્રથમ યાદી જાહેર કરવામાં આવ્યા બાદ રાજ્યનું રાજકારણ ગરમાયું છે. ભારતીય જનતા પાર્ટીના વરિષ્ઠ નેતા સુનીલ જાખડે જાલંધર ખાતે પત્રકારો સાથે વાતચીત કરતાં આમ આદમી પાર્ટીના સમગ્ર નેતૃત્વ સામે ગંભીર આક્ષેપો કર્યા છે અને સમગ્ર નેતૃત્વની ઊંડાણપૂર્વક તપાસ કરવાની માંગ ઉઠાવી છે.

સુનીલ જાખડે પ્રહાર કરતાં જણાવ્યું કે, "મારું માનવું છે કે સમગ્ર આમ આદમી પાર્ટીના નેતૃત્વની તપાસ થવી જોઈએ. પંજાબ સરકાર પાછળની અસલી તાકાત અરવિંદ કેજરીવાલ છે, જ્યારે ભગવંત માન માત્ર એક કઠપૂતળી મુખ્યમંત્રી તરીકે કામ કરી રહ્યા છે."

આપના જનપ્રતિનિધિઓની આવક અને સંપત્તિ પર સવાલ ઉઠાવતાં તેમણે જણાવ્યું કે, "મેં વારંવાર માંગણી કરી છે કે પક્ષના તમામ ધારાસભ્યોની સંપત્તિની સઘન તપાસ થવી જોઈએ અને તેમની હાલની સંપત્તિની સરખામણી પાંચ વર્ષ પહેલાંની તેમની આર્થિક સ્થિતિ સાથે કરવામાં આવે. જે લોકો એક સમયે આર્થિક સંકડામણ અનુભવતા હતા, તેઓ આજે અચાનક મોંઘીદાટ લક્ઝરી ગાડીઓમાં ફરી રહ્યા છે અને વિશાળ મિલકતોના માલિક બની બેઠા છે."

રાજ્યની કાયદો અને વ્યવસ્થા અંગે ચિંતા વ્યક્ત કરતાં ભાજપ નેતાએ ઉમેર્યું કે, "આજે પંજાબની જનતા સતત ભય અને અસુરક્ષાના માહોલમાં જીવી રહી છે. રાજ્યમાં કાયદાનું શાસન સ્થાપવાના બદલે પોલીસ તંત્રનો માત્ર રાજકીય હિતો માટે દુરુપયોગ કરવામાં આવી રહ્યો છે."