પશ્ચિમ એશિયા સંઘર્ષ દરમિયાન 14 નાવિકો સહિત 22 ભારતીય નાગરિકોના મોત

આ વર્ષે ફેબ્રુઆરીમાં અમેરિકા, ઇઝરાયલ અને ઈરાન વચ્ચે શરૂ થયેલા ભીષણ યુદ્ધે પશ્ચિમ એશિયા સહિત વૈશ્વિક સુરક્ષા સામે ગંભીર સંકટ ઊભું કર્યું છે, જેની સીધી અને દર્દનાક અસર ભારતીયો પર પણ પડી છે. આ સંઘર્ષ શરૂ થયા પછીના છેલ્લા આઠ મહિનામાં ઓછામાં ઓછા ૨૨ ભારતીય નાગરિકોએ પોતાનો જીવ ગુમાવ્યો છે. ચિંતાજનક બાબત એ છે કે માર્યા ગયેલાઓમાં ૧૪ સમુદ્રી કર્મચારીઓ (ભારતીય નાવિકો) પણ સામેલ છે, જે યુદ્ધગ્રસ્ત દરિયાઈ માર્ગો અને વ્યાપારી જહાજો પર સર્જાયેલા વધતા જોખમની ગંભીરતા દર્શાવે છે.

સાઉદી અરેબિયા પર થયેલા શ્રેણીબદ્ધ હુમલાઓમાં એક ભારતીય નાગરિકનું મોત થયાના એક સપ્તાહ બાદ બુધવારે ભારત સરકારે આ આંકડા જાહેર કર્યા હતા. 28 ફેબ્રુઆરીએ યુદ્ધ શરૂ થયું ત્યારથી અત્યાર સુધીમાં સાઉદી અરેબિયામાં ત્રણ ભારતીયોએ પોતાના જીવ ગુમાવ્યા છે.

વિદેશ મંત્રાલયના (MEA) પ્રવક્તા રણધીર જાયસવાલે બુધવારે જણાવ્યું હતું કે, "અમે પશ્ચિમ એશિયામાં ચાલી રહેલા સંઘર્ષ અંગે ખૂબ જ ચિંતિત છીએ. આ સંઘર્ષમાં આપણે ૧૪ નાવિકો સહિત ૨૨ ભારતીય નાગરિકો ગુમાવ્યા છે. અમે ગલ્ફ ક્ષેત્રમાં રહેતા અમારા સમુદાયની સુરક્ષા અને સુખાકારી માટે તેમના સતત સંપર્કમાં છીએ."

22 ઓક્ટોબરના રોજ, છેલ્લા બે સપ્તાહમાં ત્રીજી વખત ભારતે સાઉદી અરેબિયાના "નાગરિક માળખા" પરના હુમલાઓની આકરી નિંદા કરી હતી, કારણ કે દમ્મામના કિંગ ફહદ આંતરરાષ્ટ્રીય એરપોર્ટ પર થયેલા હુમલામાં એક ભારતીય નાગરિકનું મોત થયું હતું. આ ઉપરાંત, ગત મંગળવારે શાયબાહ ઓઇલ ફિલ્ડ પર થયેલા અન્ય એક હુમલામાં વધુ એક ભારતીય ઘાયલ થતાં ભારતે "મહત્વપૂર્ણ માળખાગત સુવિધાઓ" પરના હુમલાની પણ ટીકા કરી હતી.

રિયાધ સ્થિત ભારતીય દૂતાવાસે જણાવ્યું હતું કે બુધવારે સાંજે દમ્મામ એરપોર્ટ પર થયેલા હુમલામાં માર્યા ગયેલા બે લોકોમાં એક ભારતીય નાગરિક પણ સામેલ હતો, જ્યારે આઠ ઘાયલોમાં બે અન્ય ભારતીયો હતા.

છેલ્લા બે સપ્તાહમાં સાઉદી અરેબિયા પર હુમલાઓનું પ્રમાણ વધ્યું છે, જેમાં હુથીઓએ યમન તરફથી મોરચો ખોલીને સાઉદી અરેબિયાના એરપોર્ટ અને ઊર્જા ક્ષેત્રોને નિશાન બનાવ્યા છે.

નવી દિલ્હીએ અગાઉ ૮ અને ૧૧ ઓક્ટોબરના રોજ આ હુમલાઓની સખત શબ્દોમાં નિંદા કરી હતી. સાઉદી અરેબિયામાં ભારતીય સમુદાયની વસ્તી આશરે ૨૭.૪ લાખ જેટલી છે, જેમાં કુશળ અને અર્ધ-કુશળ વ્યાવસાયિકોનો સમાવેશ થાય છે. પશ્ચિમ એશિયામાં યુદ્ધ શરૂ થયા પછીના છેલ્લા આઠ મહિનામાં નવી દિલ્હીએ પોતાના નાગરિકોની સુરક્ષા માટે નિંદાત્મક નિવેદનો અને સુરક્ષા એડવાઈઝરી જારી કરવી પડી હોય તેવી આ પહેલી ઘટના નથી. છેલ્લા આઠ મહિનામાં ઓછામાં ઓછી પાંચ વખત આવી પરિસ્થિતિનું નિર્માણ થયું છે, અને વડાપ્રધાન નરેન્દ્ર મોદીએ આ વર્ષે માર્ચ અને ઓગસ્ટ મહિનામાં સાઉદી ક્રાઉન પ્રિન્સ મોહમ્મદ બિન સલમાન સાથે સંઘર્ષની વણસતી સ્થિતિ અંગે ટેલિફોનિક વાતચીત પણ કરી હતી.