‘તો અમિત શાહ બનશે વડાપ્રધાન’ અરવિંદ કેજરીવાલના દાવા પર અમિત શાહે આપ્યો જવાબ

કેન્દ્રીય ગૃહમંત્રી અમિત શાહે કહ્યું, 'હું અરવિંદ કેજરીવાલ એન્ડ કંપની અને ઇન્ડિયા ગઠબંધનને કહેવા માંગુ છું કે ભાજપના બંધારણમાં આવું કંઈ નથી. પીએમ મોદી આ કાર્યકાળ પૂર્ણ કરવા જઈ રહ્યા છે.

કેન્દ્રીય ગૃહ પ્રધાન અમિત શાહે દિલ્હીના મુખ્ય પ્રધાન અરવિંદ કેજરીવાલના વડાપ્રધાન બનવાના નિવેદન પર પ્રતિક્રિયા આપી છે. સીએમ કેજરીવાલે કહ્યું હતું કે જો ભાજપ જીતશે તો અમિત શાહ પીએમ બનશે. આના પર શાહે કહ્યું, 'હું અરવિંદ કેજરીવાલ એન્ડ કંપની અને ઇન્ડિયા ગઠબંધનને કહેવા માંગુ છું કે ભાજપના બંધારણમાં આવું કંઈ નથી. પીએમ મોદી આ કાર્યકાળ પૂર્ણ કરવા જઈ રહ્યા છે અને ભવિષ્યમાં પણ પીએમ મોદી દેશનું નેતૃત્વ કરતા રહેશે. તેથી જો પીએમ મોદી 75 વર્ષના થઈ જાય તો તેનાથી ખુશ થવાની જરૂર નથી.’

આજે AAP હેડક્વાર્ટર ખાતે પાર્ટી કાર્યકર્તાઓને સંબોધતા અરવિંદ કેજરીવાલે કહ્યું, 'તે (મોદી) આવતા વર્ષે નિવૃત્ત થશે. તેઓ અમિત શાહને વડાપ્રધાન બનાવવા માટે વોટ માંગી રહ્યા છે. કેજરીવાલે એવો પણ દાવો કર્યો કે જો ભાજપ સત્તામાં આવશે તો પાર્ટી 2 મહિનામાં ઉત્તર પ્રદેશના મુખ્યમંત્રીને બદલી દેશે. કેજરીવાલ જેલમાં હતા ત્યારે ભાજપે તેમના રાજીનામાની માંગ કરી હતી. રાજીનામું ન આપવા અંગે તેમને કહ્યું કે, 'મારા માટે મુખ્યમંત્રી પદ મહત્ત્વનું નથી. મેં મુખ્યમંત્રી પદ છોડ્યું નથી કારણ કે એક બનાવટી કેસમાં મને રાજીનામું આપવા દબાણ કરવાનું કાવતરું ઘડવામાં આવ્યું હતું.

NDA માટે ચોથો તબક્કો ખૂબ સારોઃ અમિત શાહ

લોકસભા ચૂંટણી અંગે અમિત શાહે કહ્યું કે, 'ત્રણ તબક્કામાં ભાજપના નેતૃત્વમાં એનડીએના તમામ સહયોગીઓ 200 સીટોના ​​આંકડાની નજીક પહોંચી ગયા છે. ચોથો તબક્કો એનડીએ માટે ઘણો સારો છે. અમને ત્રણ તબક્કા કરતા ચોથા તબક્કામાં વધુ સફળતા મળશે. આંધ્રપ્રદેશ અને તેલંગાણામાં પણ ચોથા તબક્કામાં મતદાન થઈ રહ્યું છે. એનડીએ અને ભાજપ બંને રાજ્યોને સંપૂર્ણ રીતે સાફ કરવા જઈ રહ્યા છે. તેમને કહ્યું કે 4 જૂને પરિણામ આવશે ત્યારે ભાજપ દક્ષિણ ભારતના કર્ણાટક, આંધ્રપ્રદેશ, તેલંગાણા, તમિલનાડુ અને કેરળમાં સૌથી મોટી પાર્ટી તરીકે ઉભરી આવશે. તેલંગાણામાં ભાજપ 10થી વધુ સીટો જીતશે.

'ભાજપની સરકાર આવશે તો મુસ્લિમ આરક્ષણ ખતમ કરીશું'

ગૃહમંત્રી શાહે કહ્યું, 'બીઆરએસ અને કોંગ્રેસ પાર્ટી વોટ બેંકની રાજનીતિ અને ભ્રષ્ટાચારમાં ડૂબેલી છે. ભત્રીજાવાદ, ભ્રષ્ટાચાર, નબળું શાસન અને તુષ્ટિકરણ, આ ચાર નાકના ઘાએ તેલંગાણાના લોકોને પરેશાન કર્યા છે. સરકાર કોઈની પણ હોય, સરકારનું સ્ટીયરીંગ હંમેશા અસદુદ્દીન ઓવૈસીના હાથમાં રહ્યું છે. આ લોકો CAAનો વિરોધ કરે છે, 370 હટાવવાનો વિરોધ કરે છે, સર્જિકલ સ્ટ્રાઈક પર સવાલો ઉઠાવે છે. આખા દેશ માટે અને ખાસ કરીને SC-ST અને OBC માટે સૌથી મોટી બાબત એ છે કે તેઓ તેલંગાણામાં 4% મુસ્લિમ અનામત લાવ્યા છે. જ્યારે પણ અહીં (તેલંગાણા) ભાજપની સરકાર આવશે, અમે અહીંથી મુસ્લિમ આરક્ષણ ખતમ કરીશું.