ત્રણ વર્ષથી વધુ સમય બાદ પાકિસ્તાનના મંત્રી ભારત આવશે, SCO ફોરમમાં લેશે ભાગ
ભારત અને પાકિસ્તાન વચ્ચેના તણાવપૂર્ણ સંબંધો વચ્ચે એક મહત્વપૂર્ણ રાજદ્વારી ઘટનાક્રમ સામે આવ્યો છે. ત્રણ વર્ષથી વધુ સમય બાદ પાકિસ્તાનનો કોઈ મંત્રી ભારતની મુલાકાતે આવવાનો છે. પાકિસ્તાને નવી દિલ્હીમાં 20થી 22 નવેમ્બર દરમિયાન યોજાનારા શાંઘાઈ કોઓપરેશન ઓર્ગેનાઇઝેશન (SCO) સિવિલાઇઝેશનલ ડાયલોગ ફોરમમાં પોતાના પ્રતિનિધિ તરીકે ક્લાઇમેટ ચેન્જ અને એન્વાયર્નમેન્ટલ કોઓર્ડિનેશન મંત્રી મુસાદિક મસૂદ મલિકને મોકલવાનો નિર્ણય લીધો છે.
20થી 22 નવેમ્બર સુધી યોજાશે ફોરમ
પાકિસ્તાનના વિદેશ મંત્રાલયે સત્તાવાર નિવેદનમાં જણાવ્યું છે કે ફેડરલ મંત્રી મુસાદિક મસૂદ મલિક 20થી 22 નવેમ્બર, 2026 દરમિયાન નવી દિલ્હીમાં યોજાનારા ત્રણ દિવસીય કાર્યક્રમમાં પાકિસ્તાનનું પ્રતિનિધિત્વ કરશે. આ પ્રથમ સિવિલાઇઝેશનલ ડાયલોગ ફોરમનું આયોજન ભારતનાં સંસ્કૃતિ મંત્રાલય અને વિદેશ મંત્રાલય સંયુક્ત રીતે કરી રહ્યાં છે. વડાપ્રધાન નરેન્દ્ર મોદી આ કાર્યક્રમનું ઉદ્ઘાટન કરે તેવી શક્યતા છે.
15 દેશોએ ભાગ લેવાની પુષ્ટિ કરી
કેન્દ્રીય સંસ્કૃતિ મંત્રી ગજેન્દ્ર સિંહ શેખાવતે જણાવ્યું હતું કે ચીન, કઝાકિસ્તાન, ઈરાન, તાજિકિસ્તાન અને ઉઝબેકિસ્તાન સહિત 15 દેશોએ ફોરમમાં ભાગ લેવાની પુષ્ટિ કરી છે. તેમણે આશા વ્યક્ત કરી હતી કે પાકિસ્તાન પણ આ કાર્યક્રમમાં સામેલ થશે. હવે પાકિસ્તાને પોતાના મંત્રીનું નામ જાહેર કરતાં તેની ભાગીદારી નિશ્ચિત થઈ છે.
રાજકીય નહીં, સાંસ્કૃતિક સંબંધો પર રહેશે ચર્ચા
ફોરમમાં ભારત-પાકિસ્તાન અને ભારત-ચીન વચ્ચેના સરહદ વિવાદ, આતંકવાદ અને અન્ય સંવેદનશીલ મુદ્દાઓ ઉઠશે કે કેમ તે અંગે પૂછવામાં આવતાં શેખાવતે કહ્યું હતું કે કાર્યક્રમનો મુખ્ય ઉદ્દેશ સાંસ્કૃતિક અને સભ્યતાકીય સંબંધોને મજબૂત કરવાનો છે. તેમણે જણાવ્યું કે ભારત અને પાકિસ્તાનનો ઐતિહાસિક તથા સાંસ્કૃતિક વિકાસ એકબીજા સાથે જોડાયેલો રહ્યો છે. તેમના જણાવ્યા મુજબ, આ મંચ દ્વારા દેશો વચ્ચે સંવાદ, સાંસ્કૃતિક સહયોગ અને પરસ્પર સમજણ વધારવાનો પ્રયાસ કરવામાં આવશે. જોકે, બંને દેશો વચ્ચેના રાજકીય અને વ્યૂહાત્મક મતભેદો યથાવત્ છે.
2001માં થઈ હતી SCOની સ્થાપના
શાંઘાઈ કોઓપરેશન ઓર્ગેનાઇઝેશનની સ્થાપના 2001માં ચીન, રશિયા, કઝાકિસ્તાન, કિર્ગિસ્તાન, તાજિકિસ્તાન અને ઉઝબેકિસ્તાન દ્વારા કરવામાં આવી હતી. ભારત અને પાકિસ્તાન 2017માં તેના પૂર્ણ સભ્ય બન્યા હતા, જ્યારે ઈરાનને 2023માં કાયમી સભ્યપદ મળ્યું હતું. SCOનો મુખ્ય હેતુ સભ્ય દેશો વચ્ચે વિશ્વાસ અને મૈત્રીપૂર્ણ સંબંધો વધારવા તેમજ પ્રાદેશિક શાંતિ, સુરક્ષા અને સ્થિરતા માટે બહુપક્ષીય સહયોગને પ્રોત્સાહન આપવાનો છે. પાકિસ્તાની મંત્રીની ભારત મુલાકાતને આ સંગઠનના સાંસ્કૃતિક સંવાદના સંદર્ભમાં મહત્વપૂર્ણ માનવામાં આવી રહી છે.
