કેદારનાથમાં ટ્રેકિંગ પર ગયેલા 2 જવાનો સહિત 5 લોકો લાપતા, હેલિકોપ્ટરથી શોધખોળ શરૂ
છેલ્લું અપડેટ : 30 Sept 2026
રુદ્રપ્રયાગ : ઉત્તરાખંડના કેદારનાથમાં બાસુકીતાલ ટ્રેક પર ગયેલું પાંચ સભ્યોનું ટ્રેકિંગ દળ લાપતા થતાં ચકચાર મચી ગઈ છે. લાપતા લોકોમાં બે પીએસી જવાનોનો પણ સમાવેશ થાય છે. 25 સપ્ટેમ્બરે કેદારનાથ-બાસુકીતાલ ટ્રેક પર ગયેલા આ દળનો પરિવારજનો સાથે સંપર્ક તૂટી ગયો છે. દળની યોજના ઓડિન કોલ થઈને ગંગોત્રી પહોંચવાની હતી. માહિતી મળતાં જ મંગળવારે બચાવ અભિયાન શરૂ કરવામાં આવ્યું છે.
2 પીએસી જવાનો સહિત 5 લોકો લાપતા
લાપતા લોકોમાં 40મી વાહિની પીએસી હરિદ્વારના અમિત ફરસ્વાણ, 40મી વાહિની પીએસી રુદ્રપ્રયાગના નવીન રાવત, ઉત્તરકાશીના ફોરેસ્ટર પ્રવેશ ચૌહાણ, જગ્ગી બગવાનના રહેવાસી વિવેક અને કેદારનાથ પશુપાલન વિભાગના સંજય સિંહ રાવતનો સમાવેશ થાય છે. પ્રવેશ ચૌહાણના પરિવારજનો દ્વારા જિલ્લા ઇમરજન્સી ઓપરેશન સેન્ટરને જાણ કરવામાં આવ્યા બાદ તંત્ર હરકતમાં આવ્યું હતું.
NDRF, SDRF અને વન વિભાગની ટીમો મેદાનમાં
માહિતી મળતાં જ પોલીસ કંટ્રોલ રૂમ, વન્યજીવ વિભાગ ગોપેશ્વર અને 40મી વાહિની પીએસી સાથે સંકલન કરવામાં આવ્યું હતું. ત્યારબાદ NDRF, SDRF અને વન વિભાગની ટીમોએ લાપતા ટ્રેકર્સની શોધખોળ શરૂ કરી હતી. હેલિકોપ્ટર દ્વારા પણ સર્ચ ઓપરેશન હાથ ધરવામાં આવ્યું હતું, પરંતુ વિસ્તારમાં ઓછી દૃશ્યતાના કારણે અભિયાન અટકાવવું પડ્યું હતું.
કાલિંદી પાસથી 67 ટ્રેકર્સને સુરક્ષિત બહાર કઢાયા
બીજી તરફ, ઉત્તરકાશીના કાલિંદી પાસ અને ઓડિન કોલ વિસ્તારમાં વરસાદ તથા બરફવર્ષા વચ્ચે ફસાયેલા 139 પર્વતારોહકો, ટ્રેકર્સ અને સહાયક સ્ટાફને બહાર કાઢવા માટે પણ બચાવ અભિયાન ચલાવવામાં આવ્યું હતું. મંગળવારે બીજા દિવસે 27 લોકોને હેલિકોપ્ટર મારફતે સુરક્ષિત બહાર કાઢવામાં આવ્યા હતા. આ સાથે અત્યાર સુધી કુલ 67 લોકોને હેલિકોપ્ટરથી રેસ્ક્યૂ કરવામાં આવ્યા છે.
મુશ્કેલ હવામાન વચ્ચે રેસ્ક્યૂ ઓપરેશન
રેસ્ક્યૂ કરાયેલા લોકોમાં ઓડિન કોલ પાસના 29, જોગિન વનના 8, સતો પંથના 8, કાલિંદી પાસના 19 અને બાસુકીતાલના 3 લોકોનો સમાવેશ થાય છે. સોમવારે પહેલા દિવસે 40 લોકોને સુરક્ષિત બહાર કાઢવામાં આવ્યા હતા. જોકે, ખરાબ હવામાનને કારણે અભિયાન રોકવું પડ્યું હતું. મંગળવારે હવામાન સુધરતાં ફરીથી હેલિકોપ્ટર દ્વારા બચાવ કામગીરી શરૂ કરવામાં આવી હતી.