Video/ સુરતમાં સહસ્ત્ર કોટીલિંગમ મંદિરમાં શિવરાત્રીની ભવ્ય ઉજવણી, શિવલિંગ પર 1000 લિટર દૂધનો અભિષેક

આજે મહાશિવરાત્રીના પવિત્ર પર્વ નિમિત્તે સુરત શહેર શિવભક્તિના રંગે રંગાયું છે. શહેરના પાલ વિસ્તારમાં આવેલા પ્રસિદ્ધ સહસ્ત્ર કોટીલિંગમ મંદિરમાં વહેલી સવારથી જ શ્રદ્ધાળુઓનું ઘોડાપૂર ઉમટ્યું હતું. ભક્તોએ 'હર હર મહાદેવ'ના નાદ સાથે સમગ્ર વાતાવરણને શિવમય બનાવી દીધું હતું.

1000 લિટર ગાયના દૂધનો અભિષેક

આ વર્ષે શિવરાત્રી નિમિત્તે મંદિરમાં વિશેષ આયોજન કરવામાં આવ્યું હતું, જેમાં પવિત્ર શિવલિંગ પર 1000 લિટર ગાયના શુદ્ધ દૂધનો અભિષેક કરવામાં આવ્યો હતો. આ દ્રશ્ય જોઈને ભક્તો ભાવવિભોર બન્યા હતા. શિવાલયમાં દૂધની ધારાઓ વચ્ચે પૂજા-અર્ચના કરી ભક્તોએ ધન્યતા અનુભવી હતી.

ભક્ત લતાબેન રૂપારેલીયાએ જણાવ્યું કે, "મંદિરનું વાતાવરણ ખૂબ જ આનંદમય છે. શિવલિંગ પર દૂધ ચડાવીને અને દર્શન કરીને મનને અનોખી શાંતિ મળી છે." ભક્તોની લાંબી કતારોને ધ્યાનમાં રાખીને મંદિર પ્રશાસન દ્વારા દર્શનની સુંદર વ્યવસ્થા કરવામાં આવી હતી.