VIDEO: રાજકોટઃ ગોંડલમાં વહેલી સવારથી જ મેઘમહેર, વાતાવરણમાં પ્રસરી ઠંડક

રાજકોટ જિલ્લાના ગોંડલ પંથકના વાતાવરણમાં આજે અચાનક જ પલટો આવ્યો છે, જ્યાં સવારથી જ કાળાડિબાંગ વાદળો ઘેરાયા બાદ વરસાદી માહોલ જામ્યો છે. છેલ્લા કેટલાક દિવસોથી અસહ્ય ગરમી અને બફારાનો સામનો કરી રહેલા સ્થાનિક લોકોને આ વરસાદી આબોહવાને કારણે મોટી આંશિક રાહત મળી છે. ઉલ્લેખનીય છે કે ગત રાત્રિના સમયે પણ ગોંડલના ગ્રામ્ય વિસ્તારોમાં હળવા વરસાદી ઝાપટા પડ્યા હતા. જે બાદ આજે સવારે પણ શહેરના મુખ્ય વિસ્તારો જેવા કે કોલેજ ચોક, ભુવનેશ્વરી મંદિર રોડ, જેલ ચોક, કોર્ટ પરિસર અને બસ સ્ટેન્ડ રોડ પર ધીમી ધારે વરસાદ નોંધાયો છે. આ સવારના વરસાદના પગલે સમગ્ર ગોંડલ શહેરમાં ખુશનુમા અને આહલાદક માહોલ સર્જાયો છે અને વાતાવરણમાં ભારે ઠંડક પ્રસરી ગઈ છે. બીજી તરફ હવામાન વિભાગ દ્વારા આગામી દિવસોમાં પણ આ પંથકમાં વાદળછાયું વાતાવરણ રહેવાની સાથે હળવાથી મધ્યમ વરસાદ પડવાની સત્તાવાર આગાહી કરવામાં આવી છે.