Video/ સુરેન્દ્રનગરમાં ખનિજ માફિયાઓ સક્રિય, બુરેલી ખાણો ફરી ખોદવાની શરૂઆત

એક તરફ સુરેન્દ્રનગર જિલ્લાનું તંત્ર ખનિજ ચોરી રોકવાના દાવા કરી રહ્યું છે, ત્યારે બીજી તરફ ખનિજ માફિયાઓ દ્વારા ફરી એકવાર બેફામ ચોરીનો ખેલ શરૂ થઈ ગયો છે. મુળી તાલુકામાં આ માફિયાઓ દ્વારા બુરેલા કાર્બોસેલની ખાણો ફરીથી ખોદવાની કાર્યવાહી શરૂ કરી દેવામાં આવી છે, જેને કારણે તંત્રની અગાઉની મહેનત પાણીમાં ગઈ છે.

કરોડોનો ખર્ચ પાણીમાં

થોડા સમય પહેલા સુરેન્દ્રનગર તંત્રએ ખનિજ માફિયાઓને અંકુશમાં લેવા માટે એક મોટી મુહિમ ચલાવી હતી. આ અભિયાન હેઠળ, 2200થી વધુ કાર્બોસેલની ખાણો તંત્રએ કરોડો રૂપિયાના ખર્ચે પૂરી દીધી હતી, જેથી કરીને ખનિજ ચોરી અટકાવી શકાય. જોકે, તંત્રનો આ કરોડો રૂપિયાનો ખર્ચ પાણીમાં ગયો હોય તેમ જણાઈ રહ્યું છે, કારણ કે માફિયાઓ ફરીથી આ બુરેલી ખાણોને ખોદીને ખનિજની બેફામ ચોરી કરવા લાગ્યા છે.

વગર ગ્રાન્ટે ખાણો બુરવાની કાર્યવાહી શરૂ

આ પરિસ્થિતિને ધ્યાનમાં રાખીને, ચોટીલા પ્રાંત અધિકારીએ ખનિજ ચોરીને તાત્કાલિક અસરથી અટકાવવા માટે કડક પગલાં લીધા છે. રસપ્રદ વાત એ છે કે, આ કાર્યવાહી વગર કોઈ સરકારી ગ્રાન્ટની મદદથી શરૂ કરવામાં આવી છે. અધિકારીએ મુળી તાલુકાને સૌપ્રથમ લક્ષ્ય બનાવીને ફરીથી આ ખાણો બુરવાની મુહિમ શરૂ કરી છે.

તંત્ર દ્વારા હાલમાં ખનિજ ચોરીને રોકવા માટે સઘન પ્રયાસો શરૂ કરવામાં આવ્યા છે, પરંતુ માફિયાઓ અને તંત્ર વચ્ચેની આ લડાઈ ક્યાં સુધી ચાલશે તે જોવું રહ્યું. આ કાર્યવાહી સ્થાનિક તંત્રના ખનિજ ચોરી વિરુદ્ધના પ્રયાસોને મજબૂત બનાવે છે.