VIDEO: સુરેન્દ્રનગર બસ સ્ટેન્ડ પાસે કોમ્પ્લેક્ષમાં વિકરાળ આગ! 3 દુકાનો રાખ, ફાયર ફાઈટરની ભારે જહેમત બાદ આગ કાબૂમાં
છેલ્લું અપડેટ : 11 Apr 2026
VIDEO: સુરેન્દ્રનગર શહેરના સૌથી વ્યસ્ત ગણાતા બસ સ્ટેન્ડ વિસ્તારમાં આજે એક મોટી હોનારત સર્જાતા રહી ગઈ છે. બસ સ્ટેન્ડની એકદમ નજીક આવેલ એક કોમર્શિયલ કોમ્પ્લેક્ષમાં અચાનક વિકરાળ આગ ફાટી નીકળતા સમગ્ર પંથકમાં અફરાતફરીનો માહોલ સર્જાયો હતો. આ દુર્ઘટનામાં 3થી વધુ દુકાનો બળીને ખાખ થઈ ગઈ હોવાના પ્રાથમિક અહેવાલ મળી રહ્યા છે.
કમ્પ્યૂટર ક્લાસમાં ભણતા બાળકો પર તોળાયું જોખમ
મળતી વિગતો અનુસાર, કોમ્પ્લેક્ષમાં આવેલ એક કમ્પ્યૂટર ક્લાસમાં જ્યારે શૈક્ષણિક કાર્ય ચાલી રહ્યું હતું, ત્યારે અચાનક શોર્ટ સર્કિટ થતા આગ લાગી હતી. જોતજોતામાં આગે આખા માળે વિકરાળ સ્વરૂપ ધારણ કરી લીધું હતું. તે સમયે ક્લાસમાં 10થી વધુ વિદ્યાર્થીઓ અને સ્ટાફ હાજર હતો. ધૂમાડાના ગોટા અને લપકારા મારતી જ્વાળાઓ વચ્ચે ફસાયેલા લોકોમાં ચીસાચીસ મચી ગઈ હતી.
ફાયર બ્રિગેડ અને પોલીસની તાત્કાલિક કાર્યવાહી
ઘટનાની જાણ થતા જ સુરેન્દ્રનગર મહાનગરપાલિકાની ફાયર બ્રિગેડની ટીમો ઘટનાસ્થળે દોડી ગઈ હતી. આગની ગંભીરતા જોતા તંત્ર દ્વારા 'મેજર કોલ' જાહેર કરવામાં આવ્યો હતો. ફાયર ફાઈટરોએ જીવના જોખમે કમ્પ્યૂટર ક્લાસમાં ફસાયેલા 10થી વધુ લોકોનું સફળતાપૂર્વક રૅસ્ક્યૂ કરી તેમને સુરક્ષિત બહાર કાઢ્યા હતા. બીજી તરફ, ટ્રાફિકની સમસ્યા ન સર્જાય અને કામગીરી ઝડપી બને તે માટે પોલીસ સ્ટેશનના પી.આઈ. સાહેબ અને તેમના સ્ટાફ દ્વારા તાત્કાલિક અસરથી બસ સ્ટેન્ડ તરફનો મુખ્ય રોડ બંધ કરી દેવામાં આવ્યો હતો.
નુકસાન અને હાલની સ્થિતિ
આગને કારણે કોમ્પ્લેક્ષની 3થી વધુ દુકાનોમાં રહેલો કિંમતી સામાન અને કમ્પ્યૂટર ઉપકરણો બળીને રાખ થઈ ગયા છે. ફાયર બ્રિગેડની અનેક ગાડીઓએ પાણીનો મારો ચલાવી આગને કાબૂમાં લેવાના પ્રયત્નો કર્યા હતા. સદનસીબે, આ ઘટનામાં કોઈ જાનહાનિના સમાચાર નથી, પરંતુ માલ-મિલકતનું નુકસાન થયું હોવાનો અંદાજ છે.