Video/ દહેજની Alivus Life Sciences કંપનીમાં ભીષણ આગ: ત્રણ કામદારો ગંભીર રીતે દાઝ્યા

ઔદ્યોગિક હબ ગણાતા ભરૂચના દહેજમાં આગની ઘટનાઓ અટકવાનું નામ નથી લઈ રહી. રવિવારે દહેજની Alivus Life Sciences Limited કંપનીમાં અચાનક ભીષણ આગ ફાટી નીકળતા દોડધામ મચી ગઈ હતી. આ દુર્ઘટનામાં કંપનીમાં કામ કરી રહેલા ત્રણ કામદારો ગંભીર રીતે દાઝી ગયા હોવાના અહેવાલ પ્રાપ્ત થયા છે.

ઘટનાની વિગત

મળતી માહિતી મુજબ, દહેજ જીઆઈડીસીમાં આવેલી એલીવસ લાઈફ સાયન્સ લિમિટેડના પ્લાન્ટમાં આજે કોઈ કારણોસર પ્રચંડ બ્લાસ્ટ સાથે આગ લાગી હતી. જોતજોતામાં આગે વિકરાળ સ્વરૂપ ધારણ કરી લીધું હતું અને આકાશમાં કાળા ડિબાંગ ધુમાડાના ગોટેગોટા ઉડતા દેખાયા હતા. આગને પગલે પ્લાન્ટમાં કામ કરતા કર્મચારીઓમાં જીવ બચાવવા માટે નાસભાગ મચી ગઈ હતી.

જાનહાનિ અને ઈજાગ્રસ્તો

આ ભીષણ આગની ચપેટમાં આવવાથી ત્રણ કામદારો દાઝી ગયા છે. ઈજાગ્રસ્તોને તાત્કાલિક અસરથી નજીકની હોસ્પિટલમાં સારવાર અર્થે ખસેડવામાં આવ્યા છે. 

ફાયર ફાઈટરોની કામગીરી

ઘટનાની જાણ થતા જ દહેજ ફાયર સ્ટેશન અને આસપાસની કંપનીઓના ફાયર ફાઈટરો ઘટનાસ્થળે પહોંચી ગયા હતા. સતત પાણીનો મારો ચલાવી આગ પર કાબૂ મેળવવાની તજવીજ હાથ ધરવામાં આવી છે.