VIDEO : જેતપુરમાં રણુંજા મંદિરના મહંત કરશનદાસ બાપુનો કૂવામાંથી મળ્યો મૃતદેહ

રાજકોટના જેતપુર-બગસરા રોડ પર બોરડી સમઢીયાળા અને ખારચિયા વચ્ચે આવેલા પ્રખ્યાત રણુંજા મંદિરના મહંત કરશનદાસ બાપુનો મૃતદેહ એક વાડીના કૂવામાંથી મળી આવતા સમગ્ર પંથકમાં ચકચાર મચી ગઈ છે. આ આઘાતજનક સમાચાર વાયુવેગે પ્રસરતાં જ મોટી સંખ્યામાં ભક્તો અને ગ્રામજનોના ટોળેટોળાં ઘટનાસ્થળે ઉમટી પડ્યા હતા અને સેવકગણમાં ભારે શોકનું મોજું ફરી વળ્યું હતું. પ્રાથમિક માહિતી અનુસાર, મહંત છેલ્લા કેટલાક સમયથી ગંભીર બીમારીથી પીડાતા હતા અને તેનાથી કંટાળીને તેમણે આ આત્યંતિક પગલું ભર્યું હોવાની આશંકા સેવાઈ રહી છે. ઘટનાની જાણ થતાં જ જેતપુર તાલુકા પોલીસની ટીમ તાત્કાલિક દોડી આવી હતી અને મૃતદેહને બહાર કાઢી પોસ્ટમોર્ટમ અર્થે ખસેડ્યો હતો. હાલ પોલીસે આ મામલે તપાસનો ધમધમાટ શરૂ કર્યો છે અને પીએમ રિપોર્ટ બાદ જ મોતના અસલી કારણનો ખુલાસો થશે.