Video/ 'બાંગ્લાદેશી મુસ્લિમો દેશ છોડે'- ઘાટલોડિયામાં બજરંગ દળનો બંગલાદેશ વિરુદ્ધ મોરચો

બાંગ્લાદેશમાં લઘુમતી હિન્દુઓ પર થઈ રહેલા અત્યાચારોના વિરોધમાં અમદાવાદના ઘાટલોડિયા વિસ્તારમાં બજરંગ દળ દ્વારા ઉગ્ર પ્રદર્શન કરવામાં આવ્યું હતું. જોકે, આ પ્રદર્શન દરમિયાન કાર્યકરો દ્વારા આપવામાં આવેલી ધમકીઓએ  નવા વિવાદને જન્મ આપ્યો છે, જે સીધો ભારત સરકારની વિદેશ નીતિ અને પીએમ મોદીના નિર્ણય સાથે ટકરાતો જોવા મળી રહ્યો છે.

'પરિણામ ભોગવવા તૈયાર રહેજો' - બજરંગ દળની ચીમકી

ઘાટલોડિયામાં એકઠા થયેલા બજરંગ દળના કાર્યકરોએ બાંગ્લાદેશમાં હિન્દુઓ પર થતી હિંસાને લઈને ભારે સુત્રોચ્ચાર કર્યા હતા. વિરોધ પ્રદર્શન દરમિયાન બજરંગ દળે કડક શબ્દોમાં ધમકી આપી હતી કે, "ભારતમાં રહેતા બાંગ્લાદેશી મુસ્લિમો તાત્કાલિક દેશ છોડી દે, અન્યથા તેઓએ ગંભીર પરિણામ ભોગવવા પડશે."

મોટો સવાલ: શું આ ધમકી શેખ હસીનાને પણ લાગુ પડે છે?

બજરંગ દળની આ ખુલ્લી ધમકી બાદ હવે કાનૂની અને રાજકીય વર્તુળોમાં એક મોટો પ્રશ્ન ઊભો થયો છે. બાંગ્લાદેશના પૂર્વ વડાપ્રધાન શેખ હસીના પણ બાંગ્લાદેશી મુસ્લિમ છે અને હાલમાં તેઓ ભારત સરકારના રક્ષણ હેઠળ ભારતમાં શરણ લઈ રહ્યા છે. પીએમ નરેન્દ્ર મોદી અને ભારત સરકારે માનવીય અને વ્યૂહાત્મક ગણતરીઓ સાથે તેમને આશ્રય આપ્યો છે.

આ સંજોગોમાં, જ્યારે બજરંગ દળ તમામ બાંગ્લાદેશી મુસ્લિમોને ભારત છોડવા કહે છે, ત્યારે શું તેઓ નામ લીધા વગર શેખ હસીનાને પણ નિશાન બનાવી રહ્યા છે?

ભારત સરકાર અને પીએમ મોદીના નિર્ણયને પડકાર?

બજરંગ દળ દ્વારા આપવામાં આવેલી આ ચીમકીથી અનેક તર્ક-વિતર્ક સર્જાયા છે. શું બજરંગ દળ ભારત સરકારની શરણાગતિ નીતિનો વિરોધ કરી રહ્યું છે? શું પીએમ મોદીએ જેમને આશ્રય આપ્યો છે, તેમને જ દેશ છોડવાની ધમકી આપીને બજરંગ દળ સરકારને પડકાર ફેંકી રહ્યું છે? આ પ્રકારના ઉશ્કેરણીજનક નિવેદનોથી દેશની આંતરિક સુરક્ષા અને આંતરરાષ્ટ્રીય છબી પર શું અસર પડશે?

સ્થાનિકોમાં ચર્ચાનો વિષય

ઘાટલોડિયામાં થયેલા આ વિરોધ પ્રદર્શન બાદ સ્થાનિક પોલીસ પણ સતર્ક બની છે. એક તરફ હિન્દુઓ પર થતા અત્યાચારનો વિરોધ વ્યાજબી મનાય છે, પરંતુ બીજી તરફ "તમામ બાંગ્લાદેશી મુસ્લિમો" ને ટાર્ગેટ કરતી ધમકીમાં ભારત સરકારના મહેમાન (શેખ હસીના) પણ આવી જતા હોવાથી મામલો પેચીદો બન્યો છે.