Tapi/ ઉચ્છલ પાસે હાઈવે પર અકસ્માત, બોલેરોની અડફેટે સાળાનું કરુણ મોત; બનેવી ઘાયલ
છેલ્લું અપડેટ : 03 Jan 2026
તાપી જિલ્લાના ઉચ્છલ તાલુકામાંથી પસાર થતા નેશનલ હાઈવે પર એક ગમખ્વાર અકસ્માત સર્જાયો છે. મીરકોટ ગામની સીમમાં બોલેરો પિકઅપ ટેમ્પાના ચાલકે બાઈક સવાર સાળા-બનેવીને અડફેટે લેતા એક આશાસ્પદ યુવાનનું ઘટનાસ્થળે જ કરુણ મોત નીપજ્યું છે.
શું છે સમગ્ર ઘટના?
મળતી માહિતી મુજબ, મહારાષ્ટ્રના નવાપુરના રહેવાસી સુનિલ ગાવિત પોતાના બનેવી સાથે બાઈક પર પસાર થઈ રહ્યા હતા. ત્યારે ઉચ્છલના મીરકોટ ગામની સીમમાં પૂરપાટ ઝડપે આવી રહેલા એક બોલેરો પિકઅપ ટેમ્પાના ચાલકે તેમની બાઈકને જોરદાર ટક્કર મારી હતી. અકસ્માત એટલો ભીષણ હતો કે સુનિલ ગાવિતને ગંભીર ઈજાઓ પહોંચતા તેમનું પ્રાણપંખેરું ઉડી ગયું હતું.
પરિવારમાં શોકનું મોજું
અકસ્માતમાં સાળા (સુનિલ ગાવિત)નું મોત થતા પરિવાર પર આભ તૂટી પડ્યું છે. સાથે મુસાફરી કરી રહેલા બનેવીને પણ નાની-મોટી ઈજાઓ પહોંચી છે. ઘટનાની જાણ થતા જ સ્થાનિક લોકો અને પોલીસ કાફલો ઘટનાસ્થળે દોડી આવ્યો હતો. પોલીસે મૃતદેહને પોસ્ટમોર્ટમ માટે ખસેડી ફરાર ટેમ્પો ચાલક વિરુદ્ધ કાયદેસરની કાર્યવાહી હાથ ધરી છે.
