Surat news: ક્રિકેટ ટૂર્નામેન્ટ દરમિયાન સ્ટેડિયમમાં બિયર પીતા બુટલેગરના પુત્રનો વીડિયો વાયરલ, આરોપીની ધરપકડ
છેલ્લું અપડેટ : 28 Mar 2026
સુરતના બારડોલીમાં રમાઈ રહેલી 'ગુજરાત ટેનિસ ક્રિકેટ ટૂર્નામેન્ટ' અત્યારે રમતને કારણે નહીં, પણ એક શરમજનક વાઈરલ વીડિયોને કારણે ચર્ચામાં છે. સરદાર પટેલ ક્રિકેટ સ્ટેડિયમમાં જ્યારે ખેલાડીઓ પરસેવો રેડી રહ્યા હતા, ત્યારે પ્રેક્ષક ગેલેરીમાં બેસીને એક યુવક બેખૌફ રીતે જાહેરમાં બિયર ઢીંચી રહ્યો હતો. આ ઘટનાએ સુરત પોલીસ અને ટૂર્નામેન્ટના આયોજકોની સુરક્ષા વ્યવસ્થા સામે મોટા સવાલો ઊભા કર્યા છે.
શું બુટલેગરના પુત્રને પોલીસનો ડર નથી?
વાઈરલ વીડિયોમાં દેખાતો યુવક બારડોલીના એક જાણીતા બુટલેગરનો પુત્ર મેહુલ હસુ રાઠોડ હોવાનું સામે આવ્યું છે. ચાલુ મેચમાં જ્યાં અનેક લોકો હાજર હોય અને બાઉન્સરો ખડે પગે હોય, ત્યાં યુવકને આટલી હિંમત ક્યાંથી આવી? સૂત્રો પાસેથી મળતી માહિતી મુજબ પિતાના કથિત ગેરકાયદે કાળો કારોબાર અને 'વગ'ને કારણે તેને કાયદાનો કોઈ ડર રહ્યો નથી.
સુરક્ષા વ્યવસ્થા માત્ર દેખાડો?
સૌથી ચોંકાવનારી વાત એ છે કે જ્યાં આ યુવક બિયર પી રહ્યો હતો, ત્યાં બરાબર તેની પાછળ જ બાઉન્સર ઊભો હોવાનું વીડિયોમાં દેખાય છે. છતાં પણ બાઉન્સરને કે આયોજકોને આ નશાખોરી કેમ ન દેખાઈ? શું સુરક્ષાના નામે માત્ર દેખાડા કરવામાં આવતા હતા. બારડોલી પોલીસ મોટા આયોજનમાં હાજર હતી કે નહીં? જો હતી તો બુટલેગર પુત્રએ કેમ આવી હિમાકત કરી? ગુજરાતમાં દારૂબંધી હોવા છતાં, સ્ટેડિયમ જેવી જાહેર જગ્યાએ બિયરની બોટલ પહોંચી કેવી રીતે? શું ચેકિંગ માત્ર નામનું જ હતું? આયોજકોએ આટલી મોટી ટૂર્નામેન્ટમાં નશાખોરી રોકવા માટે શું વ્યવસ્થા કરી હતી? શું તેઓએ જાણી જોઈને આ જોયું-અણજોયું કર્યું?
રહી રહીને જાગી પોલીસ
વીડિયો સોશિયલ મીડિયા પર આગની જેમ ફેલાતા જ બારડોલી પોલીસ સફાળી જાગી હતી. પોલીસે તાત્કાલિક કાર્યવાહી કરીને મેહુલ રાઠોડની અટકાયત કરી તેને મેડિકલ ચેકઅપ માટે સરકારી હોસ્પિટલ ખસેડ્યો હતો. મેડિકલ રિપોર્ટમાં તે નશામાં હોવાનું સાબિત થતા પોલીસે તેની વિરુદ્ધ ગુનો નોંધી ધરપકડ કરી છે.
હવે તપાસનો ગાળિયો આયોજકો ફરતે
પોલીસે માત્ર યુવક જ નહીં, પણ ટૂર્નામેન્ટના આયોજકોને પણ પૂછપરછ માટે તેડું મોકલ્યું છે. સ્ટેડિયમની અંદર નશો કરનાર વ્યક્તિ કેવી રીતે ઘૂસી તે અંગે આયોજકોના નિવેદન લેવામાં આવશે. જો આયોજકોની બેદરકારી જણાશે, તો તેમની સામે પણ કડક કાર્યવાહી થવાની પૂરેપૂરી શક્યતા છે.
