Surat/ ખજોદ મેટ્રો ભવનમાં મોટી દુર્ઘટના, લોખંડનો દરવાજો પડતા સુરક્ષા ગાર્ડનું કરૂણ મોત
છેલ્લું અપડેટ : 01 Jan 2026
સુરતના ખજોદ સ્થિત મેટ્રો ભવન (ડ્રીમ સિટી) ખાતે એક ગોઝારો અકસ્માત સર્જાયો હતો. મેટ્રો પ્લાન્ટના મુખ્ય ગેટ પર ફરજ બજાવી રહેલા 20 વર્ષીય સુરક્ષા ગાર્ડ જીતેન્દ્ર યાદવનું લોખંડનો તોતિંગ ગેટ માથે પડવાને કારણે મોત નીપજ્યું છે.
ઘટનાની વિગત
મળતી માહિતી મુજબ, ખજોદ મેટ્રો પ્લાન્ટના મુખ્ય ગેટની મરામત (રિપેરિંગ)નું કામ ચાલી રહ્યું હતું. આ દરમિયાન સુરક્ષા ગાર્ડ જીતેન્દ્ર યાદવ ગેટ ખોલી રહ્યો હતો ત્યારે અચાનક લોખંડનો વિશાળ ગેટ ધરાશાયી થયો હતો. જીતેન્દ્ર આ ગેટ નીચે દબાઈ ગયો હતો. આસપાસના લોકો દોડી આવ્યા હતા, પરંતુ ગંભીર ઈજાઓ થવાના કારણે યુવાન ગાર્ડનું ઘટનાસ્થળે જ મોત નીપજ્યું હતું.
પોલીસ કાર્યવાહી
ઘટનાની જાણ થતા જ ડ્રીમ સિટી પોલીસનો કાફલો સ્થળ પર પહોંચ્યો હતો. પોલીસે મૃતદેહનો કબજો લઈ પોસ્ટમોર્ટમ અર્થે ખસેડ્યો છે. 20 વર્ષની નાની ઉંમરે જીતેન્દ્રનું મોત થતા પરિવાર અને સાથી ગાર્ડ્સમાં શોકનું મોજું ફરી વળ્યું છે. આ ઘટનામાં મેન્ટેનન્સમાં કોઈ બેદરકારી હતી કે કેમ તે દિશામાં પોલીસે તપાસ હાથ ધરી છે.