પ્રિવિલોન બિલ્ડકોન છેતરપિંડી કેસ: બિલ્ડર હિરેન કારીયાની ધરપકડ, 14 દિવસના રિમાન્ડ મંજૂર

અમદાવાદ શહેરના બોપલ પોલીસ સ્ટેશનમાં બિલ્ડર જયદીપ કોટક અને હિરેન કારિયા સામે મકાન અને દુકાન વેચવાના નામે એક સિનિયર સીટીઝન સાથે 3.33 કરોડની છેતરપીંડી કર્યાની ફરિયાદ નોંધાઈ હતી. પોલીસે જયદીપ કોટકની ધરપકડ કરીને ગત 25 ડિસેમ્બરે અમદાવાદ ગ્રામ્ય કોર્ટમાં રજૂ કર્યો હતો. બોપલ પોલીસે આરોપીના 14 દિવસના રિમાન્ડની માંગણી કરી હતી, કોર્ટે 8 જાન્યુઆરી 2025 બપોરે 2:30 વાગ્યા સુધીના એટલે કે 14 દિવસના રિમાન્ડ મંજૂર કર્યા કર્યા હતા. જયદીપ કોટકના 14 દિવસના રિમાન્ડ પૂર્ણ થતા ફરી કોર્ટમાં રજૂ કરવામાં આવ્યો હતો. અમદાવાદ ગ્રામ્ય કોર્ટે જયદીપ કોટકને જ્યુડિશિયલ કસ્ટડીમાં મોકલવાનો આદેશ કરતા તેને જેલભેગો કરવામાં આવ્યો છે.

આ કેસમાં પોલીસે હવે મુખ્ય આરોપી હિરેન કારીયાની પણ ધરપકડ કરી છે. ધરપકડ બાદ આરોપી હિરેન કારીયાને અમદાવાદ ગ્રામ્ય કોર્ટમાં રજૂ કરવામાં આવ્યો છે. પોલીસ દ્વારા 18 મુદ્દાની માંગ સાથે આરોપી હિરેન કારીયાના 14 દિવસના રીમાન્ડની માંગ કરાઈ હતી. સરકારી વકીલે કોર્ટમાં કહ્યું હતું કે, આરોપી હિરેન ત્રણ જેટલા પાનકાર્ડ ધરાવે છે તેને લઈને તપાસ જરૂરી છે. આરોપીએ રોકાણકારોના રૂપિયા કયા ખાતામાં લીધા અને ત્યાં જમા કરાવ્યા તે અંગે તપાસ જરૂરી છે. અગાઉ પકડેલા આરોપી જયદીપ કોટક અને હિરેન કારીયા કોઈપણ ભાગીદારી ધરાવે છે કે નહીં તે અંગે તપાસ કરવી જરૂરી છે. 20 દિવસથી આરોપી ફરાર હતો તેને કોને આશરો આપ્યો અને ત્યાં ત્યાં રોકાયો તે તપાસ જરૂરી છે. અમદાવાદ ગ્રામ્ય કોર્ટે 14 દિવસના રિમાન્ડ મંજૂર કર્યા છે.

આરોપીઓએ પ્રિવિલોન બિલ્ડકોનના નામે કરી છેતરપિંડી 

આરોપીઓ જયદીપ કોટક અને  હિરેન કારીયાએ ભેગા મળી પુર્વઆયોજીત કાવતરું રચી પ્રીવીલોન બીલ્ડકોન એલ.એલ.પી નામની ભાગીદારી પેઢી બનાવી હતી. આ પેઢીના નામે ખોટો પ્રચાર કર્યો હતો કે તેમણે ઘુમા ગામની સીમ સર્વે નં. 632-A  વાળી ખુલ્લી જમીન પોતાના માલીકીની રાખી છે. આ જમીન પણ નીચે દુકાન અને તેના પર 22 માળની ફ્લેટની યોજના બનાવવાની હોવાની જાહેરાતો કરતા બોર્ડ લગાવ્યા હતા. આરોપીએ લોકોને વિશ્વાસમાં લેવા માટે સમાચાર માધ્યમો અને સોશિયલ મીડિયામાં પણ ખોટી જાહેરાતો ફરતી કરી હતી. 

ફ્લેટ અને દુકાન વેચવાના નામે 2 કરોડ 23 લાખની છેતરપિંડી

આરોપીઓ જયદીપ કોટક અને  હિરેન કારીયાએ સાણંદમાં રહેતા 65 વર્ષીય ભાવેશભાઈ ભોગીભાઈ રવાણી સાથે ફ્લેટ અને દુકાન વેચવાના નામે 2 કરોડ 23 લાખની છેતરપિંડી કરી છે. આરોપીઓએ ઘુમાની નકલી સાઈટ પર ‘રિચમન્ડ બાય પ્રીવીલોન’ નામની 22 માળની નકલી સ્કીમમાં ગ્રાઉન્ડ ફ્લોરની એક દુકાન પેટે 56 લાખ અને એક ફ્લેટ પેટે 1 કરોડ 67 લાખ 86 હજાર એમ કુલ મળી 2 કરોડ 23 લાખ રકમ રોકડ, ચેક અને RTGS મારફતે પડાવી લીધા હતા. આરોપીએ આ મિલ્કતોના નકલી દસ્તાવેજો પણ ખરીદનારને આપ્યા હતા અને  બાદમાં નકલી સ્કીમના બોર્ડ રાતોરાત ઉતારી લીધા હતા. 

નાણા પરત માંગતા હત્યાની ધમકી આપી 

ફરિયાદી ભાવેશભાઈ રવાણીને પોતાની સાથે છેતરપિંડી થઈ હોવાનું જાણવા મળતા તેમણે જયદીપ કોટક અને  હિરેન કારીયા પાસે પોતાના નાણા પરત માંગ્યા હતા. ત્યારે આ બંનેએ તેમને જાનથી મારી નાખવાની ધમકી આપી નાણા પરત ન કરતા ભોગ બનનાર ભાવેશભાઈ રવાણીએ બંને વિરુદ્ધ બોપલ પોલીસ સ્ટેશનમાં છેતરપિંડી અને હત્યાની ધમકી આપ્યાની પોલીસ ફરિયાદ નોંધાવી હતી.