Rajkot: ગેંગ વોરમાં પોલીસની કડક કાર્યવાહી, GUJCTOC હેઠળ ગુનો દાખલ થશે

રાજકોટમાં મંગળા રોડ પર ગત 29 ઓક્ટોબરની વહેલી સવારે 3.30 કલાકની આસપાસ 'મૂર્ઘા ગેંગ' અને 'પૈંડા ગેંગ'ના સભ્યો વચ્ચે જાહેરમાં થયેલા ફાયરિંગના બનાવ બાદ પોલીસે ગુનેગારોની કમર તોડવા માટે કડક વલણ અપનાવ્યું છે. પોલીસ કમિશ્નરે જાહેરાત કરી છે કે આ પ્રકારની ગેરકાયદેસર પ્રવૃત્તિઓને ડામવા માટે આરોપીઓ વિરુદ્ધ ગુજરાત નિયંત્રિત ગુનાહિત પ્રવૃત્તિઓ અધિનિયમ (GUJCTOC) હેઠળ ગુનો દાખલ કરવામાં આવશે.

પોલીસ દ્વારા લેવાયેલા કડક પગલાં:

ફાયરિંગમાં સામેલ આરોપીઓ સામે સખત કાયદા હેઠળ ગુનો દાખલ કરાશે. આરોપીઓના ગેરકાયદેસર બાંધકામોને તોડી પાડવાની કાર્યવાહી હાથ ધરવામાં આવશે.  આરોપીઓના જુના ગુનાઓમાં મળેલી જામીન રદ કરાવવાની પ્રક્રિયા પણ શરૂ કરવામાં આવશે. આરોપીઓએ ગેરકાયદેસર હથિયારો ક્યાંથી મેળવ્યા હતા, તેની ઊંડાણપૂર્વક તપાસ હાથ ધરવામાં આવશે.

આ મામલે અત્યાર સુધીમાં 8 આરોપીઓની અટકાયત કરવામાં આવી છે. પોલીસે સ્પષ્ટ કર્યું છે કે શહેરના જાહેર સ્થળોએ હિંસા ફેલાવનાર સામે કોઈ જ કાર્યવાહી કરવામાં આવશે નહીં.

ગુનાનું રિકન્સ્ટ્રક્શન

 'પૈંડા ગેંગ' અને 'સમીર મૂર્ઘા ગેંગ' વચ્ચે થયેલા સરાજાહેર ફાયરિંગના ગંભીર મામલામાં પોલીસે તપાસના ભાગરૂપે ગુનાનું રિકન્સ્ટ્રક્શન (Reconstruction) કરાવ્યું હતું. બે ગેંગ વચ્ચે થયેલી અથડામણમાં સામસામે 8 થી 10 રાઉન્ડ ફાયરિંગ થયું હતું. આ ઘટના બાદ પોલીસે તાત્કાલિક કાર્યવાહી હાથ ધરી હતી.

પોલીસની SOG (સ્પેશિયલ ઓપરેશન ગ્રુપ) ટીમ દ્વારા આ બનાવમાં પકડાયેલા તમામ આરોપીઓને આજે ઘટના સ્થળ, એટલે કે મંગળા રોડ પર લઈ જવામાં આવ્યા હતા. પોલીસે ક્રાઇમ સીનને સમજવા અને આરોપીઓની ઘટનાની સાચી પદ્ધતિ જાણવા માટે રિકન્સ્ટ્રક્શન કરાવ્યું હતું.

આ ગેંગવોર લાંબા સમયથી ચાલી રહેલી 'પૈંડા ગેંગ' અને 'સમીર મૂર્ઘા ગેંગ' વચ્ચેની દુશ્મનીનું પરિણામ હતી. પોલીસે આ બનાવમાં સંડોવાયેલા આરોપીઓ સામે GUJCTOC હેઠળ કાર્યવાહી કરવાની અને તેમના ગેરકાયદે બાંધકામો તોડી પાડવાની કાર્યવાહી પણ શરૂ કરી છે.