VIDEO: મહેસાણાના કડીની તાજ રૅસીડેન્સીના પાર્કિંગમાં ભીષણ આગ, અનેક વાહનો બળીને ખાખ, જુઓ
છેલ્લું અપડેટ : 09 Feb 2026
VIDEO: મહેસાણા જિલ્લાના કડી શહેરમાં આવેલી તાજ રૅસીડેન્સીમાં આજે આગની એક ભયાનક ઘટના સામે આવી છે. ફ્લેટના પાર્કિંગમાં અચાનક આગ ફાટી નીકળતા સમગ્ર વિસ્તારમાં ભય અને અફરાતફરીનો માહોલ સર્જાયો હતો.
વાહનો બળીને ખાખ
પ્રાપ્ત વિગતો અનુસાર, કડીના તાજ રેસીડેન્સીના પાર્કિંગમાં જ્યારે રહીશો ગાઢ નિદ્રામાં હતા અથવા પોતાના કામમાં વ્યસ્ત હતા, ત્યારે અચાનક પાર્કિંગ વિસ્તારમાં આગ ભભૂકી ઉઠી હતી. જોતજોતામાં આગે વિકરાળ સ્વરૂપ ધારણ કરી લીધું હતું અને પાર્કિંગમાં પાર્ક કરેલા અનેક વાહનો આ આગની ઝપેટમાં આવી ગયા હતા. આગ એટલી ભીષણ હતી કે વાહનો બળીને ખાખ થઈ ગયા હતા અને ધુમાડાના ગોટેગોટા આકાશમાં દેખાયા હતા.
તંત્રની કામગીરી
ઘટનાની જાણ થતાં જ રહીશો ઘરની બહાર દોડી આવ્યા હતા અને સ્થાનિક નગરપાલિકાની ફાયર ફાઈટરની ટીમને જાણ કરવામાં આવી હતી. ફાયર ફાઈટરની ટીમ તાત્કાલિક ઘટનાસ્થળે પહોંચી હતી. સ્થાનિક લોકો અને ફાયર વિભાગના જવાનોએ ભારે જહેમત બાદ પાણીનો મારો ચલાવીને આગ પર કાબૂ મેળવ્યો હતો.
જાનહાનિ ટળી
આ ભયાનક આગમાં વાહનોને મોટું નુકસાન થયું છે, પરંતુ રાહતના સમાચાર એ છે કે આ ઘટનામાં કોઈ જાનહાનિ થઈ નથી. જો આગ વધુ પ્રસરી હોત તો મોટી જાનહાનિ થઈ શકી હોત. આગ લાગવાનું ચોક્કસ કારણ હજુ સુધી જાણી શકાયું નથી, જે અંગે સ્થાનિક પોલીસે વધુ તપાસ હાથ ધરી છે.
