Mehsana: ખોટા સર્ટિફિકેટથી પ્રપંચ, ગિલોસણના સરપંચ પદ પરથી હટાવાયા
છેલ્લું અપડેટ : 05 Nov 2025
મહેસાણા જિલ્લાના ગિલોસણ ગામમાં ખોટા પ્રમાણપત્રના આધારે નાની ઉંમરમાં સરપંચ બનવાના વિવાદ બાદ આખરે મહેસાણા ટીડીઓએ મોટો નિર્ણય લીધો છે. ગિલોસણના સરપંચ અફરોજબાનુને તેમના હોદ્દા પરથી ગેરલાયક ઠેરવવામાં આવ્યા છે.
શું હતો આખો વિવાદ?
અફરોજબાનુએ સરપંચની ચૂંટણી લડતી વખતે તેમની ઉંમર 21 વર્ષની હોવાનું ખોટું એકરારનામું રજૂ કર્યું હતું. પંચાયતની ચૂંટણી લડવા માટે ઉમેદવારની ઓછામાં ઓછી ઉંમર 21 વર્ષ હોવી જરૂરી છે. જોકે, આ વિવાદ સામે આવ્યા બાદ છેલ્લી તપાસમાં તેમની વાસ્તવિક ઉંમર માત્ર 19 વર્ષની જ હોવાનું બહાર આવ્યું હતું. ખોટા દસ્તાવેજોના આધારે નાની ઉંમરમાં સરપંચ બનવાના આ 'પ્રપંચ'ને કારણે તેમને ગેરલાયક ઠેરવવામાં આવ્યા છે.
ટીડીઓનો નિર્ણય
મહેસાણા ટીડીઓએ આ મામલે કાયદેસરની કાર્યવાહી કરીને સરપંચ અફરોજબાનુને તેમના પદેથી તાત્કાલિક અસરથી દૂર કર્યા છે. હવે, નવા સરપંચની ચૂંટણી ન થાય ત્યાં સુધી ગામનો વહીવટ ચલાવવા માટે ઉપસરપંચને સરપંચનો ચાર્જ સોંપવામાં આવ્યો છે.
