Ahmedabad: બોપલમાં ભીષણ આગથી અફરાતફરી, સિલિન્ડર બ્લાસ્ટ થતાં સ્થાનિકોમાં ફફડાટ

અમદાવાદના સાઉથ બોપલ વિસ્તારમાં આવેલા જાણીતા સોબો સેન્ટર પાસે ગત મોડી રાત્રે અચાનક ભીષણ આગ ફાટી નીકળતા અફરાતફરી મચી ગઈ હતી. અહીં પતરાના શેડ બનાવીને તૈયાર કરવામાં આવેલા પતંગ અને ફટાકડાના કામચલાઉ સ્ટોલમાં આગ લાગી હતી. જોતજોતામાં આગે વિકરાળ સ્વરૂપ ધારણ કરી લેતા ફટાકડાના મોટા જથ્થામાં ધડાકા થવા લાગ્યા હતા, જેના કારણે સમગ્ર વિસ્તારમાં ફટાકડા ફૂટવાનો અવાજ ગુંજી ઉઠ્યો હતો અને સ્થાનિક રહીશોમાં ભારે ગભરાટ ફેલાયો હતો.

આગની આ ઘટના દરમિયાન એક જોરદાર વિસ્ફોટ સંભળાતા લોકોમાં ભય વધી ગયો હતો. પ્રાથમિક વિગતો મુજબ, સ્ટોલમાં રાખવામાં આવેલો ગેસ સિલિન્ડર ગરમીના કારણે ફાટતા આ મોટો બ્લાસ્ટ થયો હતો. સિલિન્ડર ફાટવાના કારણે આસપાસની દુકાનોને પણ નુકસાન પહોંચ્યું હતું અને આગ વધુ પ્રસરી હતી. પતંગ અને ફટાકડા જેવી જ્વલનશીલ વસ્તુઓ હોવાને કારણે મિનિટોમાં જ આખું માળખું બળીને ખાખ થઈ ગયું હતું. સદનસીબે, રાત્રિનો સમય હોવાથી જાનહાનિ ટળી હતી.

આ ઘટનાની જાણ થતા જ ફાયર બ્રિગેડની ટીમ તાત્કાલિક કાફલા સાથે ઘટનાસ્થળે દોડી આવી હતી. ફાયર ફાઈટરોએ સતત પાણીનો મારો ચલાવીને આગને વધુ ફેલાતી અટકાવી હતી અને ટૂંક સમયમાં તેના પર કાબૂ મેળવી લીધો હતો. આ દુર્ઘટનામાં માલસામાનને ભારે નુકસાન થયું છે, પરંતુ કોઈ વ્યક્તિને ઈજા કે જાનહાનિના સમાચાર ન મળતા તંત્રએ રાહતનો શ્વાસ લીધો છે. હાલમાં આગ લાગવાનું ચોક્કસ કારણ જાણવા માટે તપાસ હાથ ધરવામાં આવી છે.