VIDEO: મેઘરાજાની ધડબડાટી: જૂનાગઢના માંગરોળમાં 7.25 ઈંચથી વધુ વરસાદ, રાજ્યના 107 તાલુકામાં મેઘમહેર
છેલ્લું અપડેટ : 02 Jul 2026
હવામાન વિભાગના લેટેસ્ટ આંકડા અનુસાર જૂનાગઢના માંગરોળમાં સવારના 6 વાગ્યાથી બપોરના 2 વાગ્યા સુધીમાં મેઘરાજાએ ધડબડાટી બોલાવી દેતાં 7.28 ઈંચ વરસાદ ખાબકી ગયો હતો. ત્યારબાદ સૌથી વધુ ગીર સોમનાથના સુત્રાપાડામાં 4.84 ઈંચ અને જૂનાગઢના જ માળિયા હાટિના અને કેશોદમાં 4.37 ઈંચ જેટલો વરસાદ ખાબક્યો હતો.
ભારતના હવામાન વિભાગની લેટેસ્ટ અપડેટ અનુસાર આગામી 2 થી 3 દિવસમાં ચોમાસું ગુજરાત, મધ્યપ્રદેશ, હરિયાણા, પંજાબ અને રાજસ્થાનના વધુ વિસ્તારો તરફ આગળ વધે તેવી અનુકૂળ પરિસ્થિતિઓ છે. ગુજરાતના અનેક જિલ્લાઓમાં ભલે મેઘરાજાની મોડી પધરામણી થઇ પણ ગઇકાલે લગભગ 107 તાલુકામાં મેઘમહેર નોંધાતા ગુજરાતના લોકોએ રાહતનો શ્વાસ લીધો હતો અને ગરમીથી મહદઅંશે રાહત મેળવી હતી. જોકે સૌથી વધુ વરસાદ ગુજરાતના સુરત, વલસાડ, જૂનાગઢ અને ગીર સોમનાથ પર મેઘરાજાએ કૃપા વરસાવી હતી.
સુરત અને વલસાડના વરસાદની વાત કરીએ તો છેલ્લા 24 કલાકમાં સુરતના પલસાણામાં 7.99 ઈંચ, બારડોલીમાં 7.76 ઈંચ, મહુવામાં 7.52 ઈંચ, અંબિકામાં 6.46 ઈંચ, ઉમરપાડામાં 4.72 ઈંચ જેટલો વરસાદ નોંધાયો હતો. જ્યારે વલસાડના ઉમરગામમાં 7.72 ઈંચ, વાપીમાં 7.44 ઇંચ અને પારડીમાં 4.45 ઈંચ વરસાદ ખાબક્યો હતો. જેના કારણે બંધે જિલ્લામાં જળબંબાકારની સ્થિતિ સર્જાઈ હતી.
નર્મદામાં ઉપરવાસમાં ભારે વરસાદને પગલે સરદાર સરોવર ડેમમાં નવા નીરની આવક શરૂ થઇ છે. મહારાષ્ટ્ર અને મધ્યપ્રદેશમાં ભારે વરસાદના દોરને પગલે હાલમાં ડેમમાં 39315 ક્યુસેક પાણીની આવક થઈ છે. હાલમાં સરદાર સરોવર ડેમની સપાટી 126.17 મીટરે પહોંચી ગઇ છે.