VIDEO: ૫૧,૦૦૦ ચકલીઘરનું નિઃશુલ્ક વિતરણ સ્પેરો મેન શંભુભાઈ મિસ્ત્રીના સંકલ્પને મુખ્યમંત્રીનું સન્માન

ધ્રાંગધ્રાના સુથાર શંભુભાઈ મિસ્ત્રીએ વર્ષ ૨૦૧૨માં એક ચકલીના માળાને તૂટતો જોઈને લુપ્ત થતી ચકલીઓને બચાવવા ૫૧,૦૦૦ મજબૂત લાકડાના ચકલીઘર બનાવવાનો સંકલ્પ લીધો હતો. વ્યવસાયે સુથાર હોવા છતાં, આર્થિક મુશ્કેલીઓ છતાં તેમણે દરરોજ પોતાના કામમાંથી સમય કાઢીને આ સેવાકીય કાર્ય જારી રાખ્યું હતું. દસથી બાર વર્ષની અથાગ મહેનત બાદ, શંભુભાઈએ શાળાઓ, મંદિરો, તળાવ અને બગીચાઓમાં આ તમામ ૫૧,૦૦૦ ચકલીઘર વિનામૂલ્યે લગાવીને પોતાનો સંકલ્પ સિદ્ધ કર્યો છે. તેમના આ પ્રેરણાદાયી સેવાકાર્યની નોંધ લઈને રાજ્યના મુખ્યમંત્રી ભૂપેન્દ્ર પટેલે તેમને પ્રશંસા પત્ર પાઠવી વિશેષ સન્માન કર્યું છે. શંભુભાઈના આ પ્રયાસોથી શહેરી વિસ્તારોમાં ફરી ચકલીઓનો કલરવ ગુંજતો થયો છે, જે પ્રકૃતિના રક્ષણ માટે માનવતા અને પર્યાવરણ પ્રત્યેના આપણા સામાજિક ઉત્તરદાયિત્વનું અનોખું ઉદાહરણ પૂરું પાડે છે.