Ahmedabad: ઠક્કરનગર બ્રિજ પર ગમખ્વાર અકસ્માત, કારની ટક્કરે એક યુવાનનું ઘટનાસ્થળે જ મોત

અમદાવાદ શહેરમાં ફરી એકવાર એક જીવલેણ અકસ્માત સર્જાયો છે. શહેરના ઠક્કરનગર બ્રિજ પર એક કાર ચાલકે મોટરસાયકલને જોરદાર ટક્કર મારતા આ દુર્ઘટના બની હતી. આ અકસ્માતમાં મોટરસાયકલ પર સવાર બે વ્યક્તિઓ પૈકી એક યુવાનનું ઘટનાસ્થળે જ કરૂણ મોત નીપજ્યું હતું, જ્યારે અન્ય એક વ્યક્તિને ઇજા થતાં સારવાર માટે ખસેડવામાં આવી હતી. 

ઘટનાની જાણ થતાં જ ટ્રાફિક પોલીસનો કાફલો તાત્કાલિક ઘટનાસ્થળે દોડી આવ્યો હતો. પોલીસે મૃતદેહનો કબજો લઈને કાયદેસરની કાર્યવાહી હાથ ધરી હતી. પોલીસે આ મામલે ગુનો નોંધીને ફરાર કાર ચાલકને શોધવાની તજવીજ શરૂ કરી છે. અકસ્માત બાદ કાર ચાલક ઘટનાસ્થળેથી નાસી છૂટ્યો હતો.