Video: દિવાળી ખરીદી ૨૦૨૬: મોંઘવારી છતાં અમદાવાદના બજારો ધબક્યા, કાપડથી લઈને મીઠાઈ સુધી નવી ટ્રેન્ડ્સની ધૂમ

ભારતીય સંસ્કૃતિમાં તહેવારોનો રાજા ગણાતી દિવાળી આ વખતે મોંઘવારીના માહોલ વચ્ચે પણ અર્થતંત્રને નવી ઊર્જા આપી રહી છે, જ્યાં કાપડ, મીઠાઈ, ફટાકડા અને ઈલેક્ટ્રોનિક્સમાં ૨૫થી ૩૦ ટકાનો ભાવવધારો થવા છતાં બજારોમાં ગ્રાહકોની ભારે ભીડ જોવા મળી રહી છે. મધ્યપૂર્વમાં યુદ્ધના કારણે કાજુ-બદામ જેવા ડ્રાયફ્રૂટ્સ મોંઘા થતાં લોકો હવે રાસબેરી અને ક્રેનબેરી જેવી ડ્રાઈડ બેરી તરફ વળ્યા છે, જ્યારે બીજી તરફ કલેશરા બજારમાં કાંસા અને પિત્તળના વાસણોએ પુનરાગમન કર્યું છે. હિસાબ-કિતાબના ડિજિટલ યુગમાં પણ પરંપરાગત લાલ ચોપડા અને કેલેન્ડરની માંગ યથાવત્ રહી છે અને ટેક્સટાઈલ હબ અમદાવાદમાં કાપડ બજારનો વેપાર અઢી ગણો વધવાની શક્યતા દર્શાવાઈ રહી છે. ફટાકડામાં ડ્રોન બોમ્બ અને માચીસ ગન બાળકોમાં આકર્ષણનું કેન્દ્ર બન્યા છે, તો મીઠાઈ બજારમાં જેન-ઝી માટે બિસ્કોફ બૉલ અને પિસ્તા-કુનાફા જેવી વેરાયટીઓ ધૂમ મચાવી રહી છે. મોંઘવારીના કારણે ચાર સભ્યોના પરિવારનું દિવાળી બજેટ ૧૬ હજારથી વધીને ૨૧ હજાર પહોંચવા છતાં અમદાવાદીઓનો ખરીદીનો ઉત્સાહ જરાય ઓછો થયો નથી.