“વિદ્યાર્થિનીઓએ રાત્રે કોલેજની બહાર ન નીકળવું”, ગાંધીનગર GMERS મેડિકલ કોલેજના ડીનના પરિપત્રથી વિવાદ

GMERS Medical College in Gandhinagar: કોલકાત્તાની આર.જી. કાર મેડિકલ કૉલેજની હૉસ્પિટલમાં ડૉક્ટર પર દુષ્કર્મ અને હત્યાને લઈને દેશભરમાં ભારે રોષ જોવા મળી રહ્યો છે. ડૉક્ટરોથી લઈને સામાન્ય લોકો આ જઘન્ય કૃત્ય આચરનાર આરોપીઓને કડક સજા થાય તેવી માંગ કરી રહ્યા છે. 

આ દરમિયાન ગાંધીનગરની GMERS મેડિકલ કૉલેજ દ્વારા મહિલા ડૉક્ટરો અને વિદ્યાર્થિનીઓને સાવચેત રહેવા સૂચના આપવામાં આવી છે. આ મેડિકલ કૉલેજના ડીને વિદ્યાર્થિનીઓ માટે પરિપત્ર જાહેર કર્યો છે. આ પરિપત્રમાં મહિલા ડૉક્ટરોને સુરક્ષા આપવાને બદલે પોતાની સંભાળ રાખવા જણાવ્યું છે. 

જાણો શું છે પરિપત્રમાં?

ગાંધીનગર મેડિકલ કૉલેજના ડીન ડૉ.શોભના ગુપ્તાએ પરિપત્ર બહાર પાડીને મહિલા ડૉક્ટરો, વિદ્યાર્થિનીઓ અને સ્ટાફને રાત્રે બહાર ન નીકળવા અને જરૂર જણાય તો કોઈને સાથે લઈ જવા જણાવ્યું છે. હોસ્ટેલમાં પણ મહિલા કે પરિચિત સહકર્મચારી સાથે રહો. એવું પણ કહેવામાં આવ્યું છે કે જો કોઈ અપ્રિય પરિસ્થિતિ હોય તો મહિલા હેલ્પલાઇન 181 પર ફોન કરો.

મહિલા ડૉક્ટરો અને વિદ્યાર્થિનીઓમાં પરિપત્ર સામે નારાજગી

GMERS મેડિકલ કૉલેજના ડીન ડૉ.શોભના ગુપ્તાના પરિપત્રને લઈને કૉલેજના મહિલા ડૉક્ટરો અને વિદ્યાર્થિનીઓમાં ભારે રોષ જોવા મળી રહ્યો છે. તેમનું કહેવું છે કે ડીનના આદેશમાં તેમની સુરક્ષા માટે શું વ્યવસ્થા કરવામાં આવી છે તેનો ઉલ્લેખ નથી. ઉલટાનું તેમને સૂચના આપવામાં આવી છે. તેઓનું કહેવું છે કે, ઇમરજન્સીમાં ગમે ત્યારે બહાર જવું પડે છે. આવી સ્થિતિમાં એકલા જવું પડે છે. મેડિકલ કૉલેજ પ્રશાસને તેમની સુરક્ષા માટે પગલાં લેવા જોઈએ. તે આ જવાબદારી ટાળવાનો પ્રયાસ કરી રહ્યો છે. કૉલેજ મેનેજમેન્ટે સમગ્ર કેમ્પસમાં સુરક્ષા કડક કરવી જોઈએ અને અજાણ્યા લોકો પર નજર રાખવી જોઈએ.