Chhota udaipur news: સરકારી કર્મીનું કારસ્તાન; સિનિયરની ખોટી સહી દ્વારા 1.30 કરોડની ઉચાપત કરી, એક વર્ષથી કરતો હતો છેતરપિંડી
છેલ્લું અપડેટ : 21 Nov 2025
છોટા ઉદેપુર જિલ્લા જળ અને સ્વચ્છતા એકમ કચેરીમાં આસિસ્ટન્ટ એકાઉન્ટન્ટે વાસ્મોના યુનિટ મેનેજર અને જિલ્લા સંયોજકની ખોટી સહી કરીને 1 કરોડ રૂપિયાથી વધુ રકમ પોતાના બેંક ખાતામાં ટ્રાન્સફર કર્યા હોવાની છોટા ઉદેપુર પોલીસ સ્ટેશનમાં ફરિયાદ નોંધાવવામાં આવી છે. આસિસ્ટન્ટ એકાઉન્ટન્ટ અંદાજે એક વર્ષ દરમિયાન વિવિધ ગ્રાન્ટની રકમ પોતાના પર્સનલ બેંક ખાતામાં જમા કરીને છેતરપિંડી આચરી હતી. સમગ્ર મામલે પોલીસે ફરિયાદના આધારે આગળની કાર્યવાહી હાથ ધરી છે.
વાસ્મો વિભાગના આસીસ્ટંટ એકાઉન્ટન્ટે 1 કરોડથી વધુ રકમની કરી ઉચાપત
પોલીસ ફરિયાદ મુજબ, છોટાઉદેપુર જિલ્લા જળ અને સ્વચ્છતા એકમ કચેરીમાં તિમિર હસમુખભાઈ પટેલ આસિસ્ટન્ટ એકાઉન્ટન્ટ તરીકે ફરજ બજાવતા હતા અને બેંક એકાઉન્ટ લગતી તમામ કામગીરી સંભાળતા હતા. તિમિર પટેલે તેમના હસ્તકમાં રહેતા કચેરીના ચેકો તથા RTGS ફોર્મ તથા વિભાગ તરફથી આવતી અલગ-અલગ ગ્રાન્ટના નાણાંની રકમ ચેકોમાં ભર્યા હતા. જેમાં આરોપી તિમિરે વાસ્મો યુનિટ મેનેજર અજય નગીનભાઈ ચોધરી તથા જિલ્લા સંયોજક કેયુર દિપકભાઈ નાયકનાની ખોટી સહીઓ કરી અને ચેકો સાથેના RTGS ફોર્મમાં ઓફિસના સિક્કા મારીને સરકારી બેંક એકાઉન્ટમાં જમા કરાવ્યા હતા.
ગત 8 નવેમ્બર, 2024થી 16 ઓક્ટોબર, 2025ના સમયગાળા દરમિયાન આરોપી તિમિરે કુલ રૂ.1,41,06,820 જેટલા સરકારી નાણાં બોડેલી સ્થિત HDFC બેંકના પોતાના ખાતામાં જમા કર્યા હતા. જેમાંથી તિમિરે 10,49,500 રૂપિયા સરકારી બેંક ખાતામાં પરત જમા કર્યા હતા. પરંતુ બાકીની કુલ રૂ.1.30 કરોડથી વધુની રકમની ઉચાપત કરી હતી.
સમગ્ર મામલે જાણ થતાં વાસ્મો યુનિટ મેનેજર અજય ચોધરીએ આસીસ્ટન્ટ એકાઉન્ટન્ટ મૂળ ખેડાના કપડવંજના તિમિર પટેલ વિરુદ્ધ છોટાઉદેપુર પોલીસ સ્ટેશનમાં છેતરપિંડીની ફરિયાદ નોંધાવી હતી. પોલીસે 1 કરોડથી વધુની રકમ ઉચાપત કરનારા આસિસ્ટન્ટ એકાઉન્ટન્ટને ઝડપી પાડવા આગળની કાર્યવાહી હાથ ધરી છે.
