VIDEO: સ્કૂલના કાર્યક્રમમાં આવેલા ધારાસભ્યને સ્થાનિકોએ ઘેર્યા, વીડિયો રેકોર્ડ કરતાં ગભરાયા 

અમદાવાદના અસારવા વિધાનસભાના ભાજપના ધારાસભ્ય દર્શનાબેન વાઘેલાને સ્થાનિક લોકોએ ઘેરી લીધા હતા. સ્થાનિકોએ પ્રજાના પ્રાથમિક સુવિધાના કામો ન થતા હોવા અને લઈને ધારાસભ્ય દર્શનાબેન વાઘેલા સામે ઉગ્ર રજૂઆત કરી હતી. આ દરમિયાન કોઈ વ્યક્તિ તેમની વાતચીતનો વીડિયો ઉતારતા હતા. દર્શનાબેન આ જોઈ જતા તેમના માણસને ઈશારો કરી મોબાઈલ રેકોર્ડિંગ બંધ કરવા સૂચના આપી હતી. સ્થાનિકોએ રોડ, પાણી, ગટરના કોઈ કામો થતા ન હોવાની રજૂઆત કરી હતી.

અસારવા સિવિલ હોસ્પિટલની સામે આવેલી જહાંગીરપુરા સ્કૂલમાં ધારાસભ્ય દર્શનાબેન અને સ્થાનિક શાહીબાગ વોર્ડના કોર્પોરેટરો તેમજ સંગઠનના હોદ્દેદારો આવ્યા હતા.ધારાસભ્ય આમ મળતા ન હોવાથી સ્થાનિક લોકો સીધા સ્કૂલ ઉપર પહોંચી ગયા હતા. કાર્યક્રમ પૂરો કરી ભાજપના ધારાસભ્ય દર્શનાબેન બહાર આવતા તેમને મહિલાઓએ ઘેરી લઈને રજૂઆત કરી હતી.