VIDEO: બનાસકાંઠામાં મહાસંગ્રામ: કંકુ ચૌધરીને પાછી લાવવા ઉમટ્યું માનવ મહેરામણ!
છેલ્લું અપડેટ : 18 Mar 2026
VIDEO: બનાસકાંઠા જિલ્લાના ભાભર તાલુકાના રૂણી ગામમાં આજે એક અદભુત સામાજિક એકતાના દર્શન થયા હતા. ચૌધરી સમાજની દીકરી કંકુ ચૌધરીને પરત લાવવાની માંગ સાથે આયોજિત વિશાળ મહાસંમેલનમાં હજારોની સંખ્યામાં સમાજના લોકો એકત્રિત થયા હતા. આ મામલે છેલ્લા કેટલાક સમયથી ચાલી રહેલા વિવાદે હવે મોટું સ્વરૂપ ધારણ કર્યું છે.
સમાજની એકજૂટતા અને મુખ્ય માંગણી
અગાઉ અન્ય સમાજની દીકરીને પરત સોંપવામાં આવી હોવાનો ઉલ્લેખ કરી, ચૌધરી સમાજના આગેવાનોએ સ્પષ્ટ કર્યું હતું કે હવે તેમની દીકરીને પણ સત્વરે પરત લાવવામાં આવે. રૂણી ગામના આ પાદરમાં ઉમટેલી ભીડ સમાજની લાગણી અને આક્રોશ બંને વ્યક્ત કરતી હતી. જોકે, આ દરમિયાન દીકરી કંકુ ચૌધરીનો એક વીડિયો સોશિયલ મીડિયામાં વાયરલ થયો છે, જેમાં તેણે કોઈ વિખવાદ ન કરવા અને શાંતિ જાળવવા અપીલ કરી છે.
આગેવાનોની મધ્યસ્થી અને 5 દિવસની સમયમર્યાદા
સંમેલનમાં વાતાવરણ તંગ ન બને તે માટે સમાજના વડીલો અને આગેવાનોએ મહત્વની ભૂમિકા ભજવી હતી. ઉશ્કેરાયેલા યુવાનોને શાંતિ જાળવવા અને કાયદો હાથમાં ન લેવા સમજાવવામાં આવ્યા હતા. આગેવાનોએ ખાતરી આપી છે કે આગામી પાંચ દિવસમાં દીકરીને પરત લાવવા માટે તમામ પ્રયાસો કરવામાં આવશે. આ ખાતરી બાદ હાલ પૂરતો મામલો શાંત પડ્યો હોય તેવું જણાય છે, પરંતુ સમાજમાં હજુ પણ ભારે ઉત્તેજના વ્યાપેલી છે.
