Ahmedabad: દોઢ વર્ષનું બાળક રમતાં-રમતાં આખુ હલ્ક' રમકડું ગળી ગયું, સિવિલ હોસ્પિટલમાં કરાઈ જટિલ સર્જરી

અમદાવાદની સિવિલ હોસ્પિટલમાં એક અત્યંત ચોંકાવનારો અને તબીબી જગત માટે પડકારરૂપ કિસ્સો સામે આવ્યો છે. 1.5 વર્ષનો માસૂમ બાળક વંશ રમતાં-રમતાં આખેઆખું ‘હલ્ક’ નામનું પ્લાસ્ટિકનું રમકડું ગળી ગયો હતો. 18 જાન્યુઆરીએ જ્યારે બાળકના ચહેરા પર અચાનક તકલીફના હાવભાવ દેખાયા અને તેને ઊલટી થઈ, ત્યારે માતા ભાવિકાબેનને શંકા ગઈ. તપાસ કરતાં માલૂમ પડ્યું કે, વંશના રમકડાંમાંથી એક રમકડું ગાયબ હતું અને પૂછપરછ કરતાં બાળકે તે ગળી ગયાનું કબૂલ્યું હતું. પરિવાર તાત્કાલિક બાળકને સિવિલ હોસ્પિટલ લાવ્યો, જ્યાં એક્સ-રેમાં આખું રમકડું હોજરીમાં હોવાનું દેખાતા તબીબો પણ સ્તબ્ધ થઈ ગયા હતા.

આ પણ વાંચો :

Ahmedabad/ દુર્ગા સ્કૂલમાં ચોંકાવનારી ઘટના, વિદ્યાર્થીની પાણીની બોટલમાં સહપાઠીએ નાખી અજાણી ગોળી

Ahmedabad news: ઠક્કરનગરમાં નજીવી બાબતમાં ઉશ્કેરાઈને સગા ભાઈ જે ભાઈની કરી હત્યા

આખુ રમકડું હોવાથી મોટો પડકાર ઉભો થયો

આ જટિલ સર્જરી અને તેમાં રહેલા જીવના જોખમ વિશે સિવિલ સુપ્રીટેન્ડન્ટ ડૉ. રાકેશ જોશીએ જણાવ્યું કે, બાળકની હોજરીમાં ફસાયેલું રમકડું કોઈ ટુકડો નહીં પણ હાથ, પગ અને માથું ધરાવતું પૂર્ણ કદનું રમકડું હતું. અન્નનળી અને જઠર વચ્ચે એક કુદરતી વાલ્વ હોય છે; આ વાલ્વમાંથી આટલા મોટા રમકડાને પસાર કરવું એ સૌથી મોટો પડકાર હતો. એન્ડોસ્કોપના નાજુક ઇન્સ્ટ્રુમેન્ટથી જ્યારે અમે તેને પકડવાનો પ્રયાસ કરતા ત્યારે હોજરીમાં રહેલી હવાને કારણે રમકડું સતત લપસ્યા કરતું હતું. જો અમે તેને હાથ કે પગના ભાગેથી પકડીને ખેંચ્યું હોત, તો તે વાલ્વમાં ફસાઈ જવાની અને વાલ્વને કાયમી નુકસાન પહોંચાડવાની પૂરેપૂરી શક્યતા હતી. અમે અત્યંત ધીરજ રાખી રમકડાના માથાના ભાગ પર પકડ જમાવી અને સાવચેતીપૂર્વક વાલ્વ ક્રોસ કરાવી તેને બહાર કાઢ્યું. જો આ રમકડું આંતરડામાં ઉતરી ગયું હોત તો આંતરડું ફાટવાનો ભય હતો અને ત્યારબાદ ઓપરેશન અનિવાર્ય બની જાત.

ઓપરેશન બાદ બાળક સંપૂર્ણ સ્વસ્થ

ઓપરેશન બાદ વંશ હવે સંપૂર્ણ સ્વસ્થ છે. બાળકના પિતા ભાવેશભાઈ સહાનીએ અન્ય વાલીઓને અપીલ કરતાં જણાવ્યું કે, "બાળકોને આવા નાના રમકડાં ક્યારેય રમવા ન આપવા જોઈએ અને બાળક રમતું હોય ત્યારે સતત ધ્યાન રાખવું જોઈએ. સિવિલના તબીબોની સમયસૂચકતા અને કુશળતાને કારણે જ આજે મારો પુત્ર સુરક્ષિત ઘરે જઈ રહ્યો છે."