Ahmedabad / નરોડામાં સ્પા મેનેજરને ઢોર માર મારી ચોથા માળેથી નીચે ફેંકી દીધો
છેલ્લું અપડેટ : 06 Aug 2026
નરોડામાં મુઠીયા ટોલનાકા નજીક આવેલા વિશાલા એવન્યુ સ્થિત 'ત્રિશા સ્પા'માં ગઈકાલે બુધવારની રાત્રે હત્યાનો એક સનસનાટીભર્યો બનાવ સામે આવ્યો છે. સ્પામાં માત્ર 2 જ દિવસ અગાઉ મેનેજર તરીકે નોકરી પર જોડાયેલા દશરથ મીણા પર કેટલાક શખ્સોએ અચાનક હુમલો કર્યો હતો. હુમલાખોરોએ દશરથને ઢોર માર માર્યો હતો અને ત્યારબાદ બિલ્ડિંગના 4થા માળેથી નીચે ફેંકી દીધો હતો
ગંભીર ઈજાઓ થતાં સ્પા મેનેજરનું મોત!
આ ઘટનામાં ગંભીર ઈજાઓ પહોંચવાને કારણે મેનેજરનું સ્થળ પર જ મોત નીપજ્યું હતું. ઘટના પહેલાં થયેલી મારામારીના CCTV ફૂટેજ પણ સામે આવ્યા છે. આ મામલે પોલીસે ગુનો નોંધીને વધુ કાર્યવાહી હાથ ધરી છે.
સ્પામાં કામ કરતી એક યુવતી સાથે જોડાયેલો વિવાદ
પોલીસની પ્રાથમિક તપાસમાં હત્યાનું મુખ્ય કારણ સ્પામાં કામ કરતી એક યુવતી સાથે જોડાયેલો વિવાદ હોવાનું ખૂલ્યું છે. જો કે, આ ઘટનાએ સ્પાની આડમાં ચાલતા કાળા કારોબારની પણ પોલ ખોલી નાખી છે. અહીં માત્ર સ્પા જ નહીં, પરંતુ તેની આડમાં દેહવેપારનું મોટું નેટવર્ક, દારૂની ગેરકાયદેસર મહેફિલો અને ડ્રગ્સ પાર્ટીઓ પણ ચાલતી હોવાની વિગતો સામે આવી છે. આ ગેરકાયદે પ્રવૃત્તિઓને લીધે જ અદાવત ઊભી થઈ હોવાની શક્યતા સેવાઈ રહી છે.
હત્યાના આ ગુના બાદ સ્થાનિક પોલીસ, ક્રાઈમ બ્રાન્ચ અને FSLની ટીમોએ તપાસનો ધમધમાટ શરૂ કર્યો છે. પોલીસે આસપાસના CCTV ફૂટેજ, ટેકનિકલ સર્વેલન્સ અને મોબાઈલ કોલ ડિટેલ્સ (CDR)ના આધારે પુરાવા એકત્રિત કરી વધુ તપાસ તેજ કરી છે.