અમદાવાદ એરપોર્ટ પર ફ્લાઇટ્સ ઘટી, હવાઈ ભાડાંમાં તોતિંગ વધારો

અમદાવાદના સરદાર વલ્લભભાઈ પટેલ ઇન્ટરનેશનલ એરપોર્ટ પર ફ્લાઇટ્સની સંખ્યામાં ઘટાડો થતાં હવાઈ મુસાફરોની મુશ્કેલીઓ વધી રહી છે. શિયાળુ સમયપત્રક (Winter Schedule) અમલી બન્યા છતાં ગયા વર્ષની સરખામણીએ સ્થાનિક અને આંતરરાષ્ટ્રીય ફ્લાઇટ્સની અવરજવરમાં ઘટાડો નોંધાયો છે. ફ્લાઇટ્સના ઓછા વિકલ્પો અને મુસાફરીની વધતી માંગને કારણે હવાઈ ભાડાંમાં પણ વધારો જોવા મળી રહ્યો છે. એરપોર્ટના આંકડા અનુસાર, સપ્ટેમ્બર 2026માં સ્થાનિક ફ્લાઇટ્સની અવરજવર વાર્ષિક ધોરણે 18 ટકા ઘટીને 5,468 થઈ છે. ગયા વર્ષે સપ્ટેમ્બરમાં આ આંકડો 6,668 હતો. બીજી તરફ, આંતરરાષ્ટ્રીય ફ્લાઇટ્સની અવરજવર પણ 15.1 ટકા ઘટીને 1,249થી 1,060 થઈ ગઈ છે. નાણાકીય વર્ષ 2026-27ના પ્રથમ છ મહિનામાં પણ આ ઘટાડો યથાવત રહ્યો છે. એપ્રિલથી સપ્ટેમ્બર દરમિયાન સ્થાનિક ફ્લાઇટ્સની અવરજવર 8.7 ટકા ઘટીને 38,290 નોંધાઈ છે, જ્યારે આંતરરાષ્ટ્રીય ફ્લાઇટ્સમાં 23.6 ટકાનો ઘટાડો નોંધાયો છે. આ સમયગાળામાં આંતરરાષ્ટ્રીય ફ્લાઇટ્સની સંખ્યા 8,229થી ઘટીને 6,290 થઈ છે.

મુસાફરોની સંખ્યામાં પણ ઘટાડો

ફ્લાઇટ્સની સંખ્યામાં ઘટાડાની અસર મુસાફરોની અવરજવર પર પણ પડી છે. સપ્ટેમ્બર મહિનામાં સ્થાનિક મુસાફરોની સંખ્યા 9.2 ટકા ઘટીને 8.3 લાખથી 7.5 લાખ થઈ છે. જ્યારે આંતરરાષ્ટ્રીય મુસાફરોની સંખ્યા 15.8 ટકા ઘટીને 1.8 લાખથી 1.5 લાખ નોંધાઈ છે. એપ્રિલથી સપ્ટેમ્બર દરમિયાન સ્થાનિક મુસાફરોની સંખ્યામાં 2.3 ટકાનો ઘટાડો થયો છે અને આ આંકડો 54 લાખથી ઘટીને 52.8 લાખ થયો છે. આંતરરાષ્ટ્રીય મુસાફરોની સંખ્યા પણ 19.3 ટકા ઘટીને 11.8 લાખથી 9.58 લાખ થઈ છે.

દિવાળીના પ્રવાસ પર પણ અસર

ટ્રાવેલ ઉદ્યોગના નિષ્ણાતોના જણાવ્યા અનુસાર, ફ્લાઇટ્સના વિકલ્પો ઓછા થતાં મુસાફરોની પસંદગી મર્યાદિત થઈ છે. ખાસ કરીને વધુ માંગ ધરાવતા માર્ગો પર બેઠકોની અછત સર્જાતાં ભાડાં વધવાની શક્યતા વધી છે. છેલ્લી ઘડીએ ટિકિટ બુક કરાવનારા મુસાફરોને સૌથી વધુ અસર થઈ રહી છે. નિષ્ણાતોના મતે, દિવાળીના સમયગાળા દરમિયાન ઊંચા હવાઈ ભાડાંને કારણે કેટલાક મુસાફરો તહેવાર પહેલાં અથવા પછી મુસાફરી કરવાનું પસંદ કરી રહ્યા છે. આમ, ફ્લાઇટ્સની ઘટતી સંખ્યા અને મુસાફરીની મજબૂત માંગને કારણે અમદાવાદ એરપોર્ટ પરથી મુસાફરી કરતા લોકોના ખિસ્સા પર વધારાનો બોજ પડી રહ્યો છે.