જસ્ટિસ સુનિતા અગ્રવાલની સુપ્રીમમાં નિમણૂક માટે કોલેજિયમની ભલામણ, ગુજરાત હાઈકોર્ટને મળી શકે છે નવા મુખ્ય ન્યાયાધીશ
છેલ્લું અપડેટ : 28 Sept 2026
ગુજરાત હાઈકોર્ટના મુખ્ય ન્યાયાધીશ જસ્ટિસ સુનિતા અગ્રવાલને સુપ્રીમ કોર્ટના જજ તરીકે બઢતી આપવાની ભલામણ કરવામાં આવી છે. સુપ્રીમ કોર્ટ કોલેજિયમે ત્રણ હાઈકોર્ટના મુખ્ય ન્યાયાધીશોને સુપ્રીમ કોર્ટના જજ તરીકે નિયુક્ત કરવાની ભલામણ કરી હોવાનું અહેવાલોમાં સામે આવ્યું છે.
જસ્ટિસ સુનિતા અગ્રવાલ હાલમાં ગુજરાત હાઈકોર્ટના મુખ્ય ન્યાયાધીશ તરીકે કાર્યરત છે. કોલેજિયમની ભલામણને પગલે જસ્ટિસ અગ્રવાલની સુપ્રીમ કોર્ટમાં નિમણૂક થાય તો ગુજરાત હાઈકોર્ટમાં મુખ્ય ન્યાયાધીશનું પદ ખાલી થશે. ત્યારબાદ આ પદ માટે નવા મુખ્ય ન્યાયાધીશની નિમણૂકની પ્રક્રિયા હાથ ધરાશે.
ગુજરાત હાઇકોર્ટના બીજા મહિલા ચીફ જસ્ટિસ તરીકે બનાવી ઓળખ
મૂળ અલ્હાબાદ હાઈકોર્ટના જજ જસ્ટિસ સુનિતા અગ્રવાલે જુલાઈ 2023માં ગુજરાત હાઈકોર્ટના ચીફ જસ્ટિસ તરીકે શપથ લીધા હતા. તેઓ ગુજરાત હાઈકોર્ટના ઈતિહાસમાં ચીફ જસ્ટિસ પદ સંભાળનારા બીજા મહિલા જજ બન્યા હતા. 1989માં અવધ યુનિવર્સિટીમાંથી લો (Law) ની ડિગ્રી મેળવ્યા બાદ, તેમણે 1990માં એડવોકેટ તરીકે નોંધણી કરાવી હતી અને અલાહાબાદ હાઈકોર્ટમાં સિવિલ તથા બંધારણીય ક્ષેત્રે વ્યાપક પ્રેક્ટિસ કરી હતી.
એક દાયકાથી વધુની તેજસ્વી ન્યાયિક કારકિર્દી
જસ્ટિસ અગ્રવાલની નવેમ્બર 2011માં અલાહાબાદ હાઈકોર્ટના એડિશનલ જજ તરીકે પદોન્નતિ થઈ હતી અને ઓગસ્ટ 2013માં તેઓ પરમેનેન્ટ જજ બન્યા હતા. એક દાયકાથી વધુ સમયની તેમની તેજસ્વી ન્યાયિક કારકિર્દી દરમિયાન તેમણે બંધારણીય અધિકારો, નાગરિક સ્વતંત્રતા અને વહીવટી કાયદાઓ પર અનેક સીમાચિહ્નરૂપ અને મહત્વપૂર્ણ ચુકાદાઓ આપ્યા છે.
અન્ય બે હાઇકોર્ટના ચીફ જસ્ટિસના નામની પણ ભલામણ
સુપ્રીમ કોર્ટ કોલેજિયમે જસ્ટિસ સુનિતા અગ્રવાલની સાથે અન્ય બે હાઇકોર્ટના ચીફ જસ્ટિસને પણ સર્વોચ્ચ અદાલતમાં પદોન્નત કરવા ભલામણ કરી છે. જેમાં દિલ્હી હાઈકોર્ટના ચીફ જસ્ટિસ દેવેન્દ્ર કુમાર ઉપાધ્યાય અને તેલંગાણા હાઈકોર્ટના ચીફ જસ્ટિસ અપરેશ કુમાર સિંહના નામનો સમાવેશ થાય છે. કોલેજિયમની આ ભલામણ બાદ હવે કેન્દ્ર સરકાર દ્વારા વિધિવત મંજૂરી આપ્યા પછી તેમના નામનું નોટિફિકેશન બહાર પાડવામાં આવશે.
