Ahmedabadમાં રીઢો વાહનચોર પકડાયો, પત્નીની બેવફાઈને લીધે ટુ-વ્હીલરથી નફરત થતાં શરૂ કરી હતી ચોરી

અમદાવાદમાંથી એક એવો રીઢો વાહનચોર પકડાયો છે, જેના ગુનાહિત ઈતિહાસની સાથે જીવનની પણ એક કહાની ફિલ્મી જેવી છે. એલસીબીએ હિતેશ જૈન નામના રીઢા વાહન ચોરને પાંચ ટુ-વ્હીલર સાથે ઝડપી લીધો છે.

આરોપી હિતેશ જૈને શહેરના એક પણ પોલીસ સ્ટેશનમાં ગુનો આચરવાનું બાકી રાખ્યું નથી, તેણે અત્યાર સુધીમાં આશરે 150થી વધુ ગુના આચર્યા છે. જોકે ટુ-વ્હીલર જ ચોરી કરવા પાછળનું કારણ એવું સામે આવ્યું છે કે તેની પત્નીની બેવફાઇના લીધે તે આ રવાડે ચઢ્યો હતો. તેણે તેની પત્નીને ટુ-વ્હીલર ભેટમાં આપ્યું તે ટુ-વ્હીલર લઈ પત્ની તેના પ્રેમીને મળવા જતી હતી. જેથી હિતેશને એટલી નફરત થઈ ગઈ તે સ્કૂટર ચોર બની ગયો. તે એક જગ્યાએથી ટુ-વ્હીલર ચોરી કરતો અને પેટ્રોલ પૂરું થઇ જાય ત્યાં જ બિનવારસી મૂકીને બીજેથી નવું ટુ-વ્હીલર ચોરીને શહેરમાં ફરતો હતો.