'થામા' આયુષ્માન ખુરાનાના કરિયરની સૌથી મોટી ઓપનર બની, સાથે ઘણા રેકોર્ડ પણ બનાવ્યા

આયુષ્માન ખુરાના છેલ્લા ઘણા સમયથી એક મોટી હિટ ફિલ્મની રાહ જોઈ રહ્યો હતો, હવે તેની રાહનો અંત આવ્યો છે. આયુષ્માન અને રશ્મિકા મંદાનાની ફિલ્મ 'થામા' 21 ઓક્ટોબર, મંગળવારના રોજ સિનેમાઘરોમાં રિલીઝ થઈ હતી અને અપેક્ષા મુજબ, તેને શરૂઆતના દિવસે જ દર્શકો તરફથી જબરદસ્ત પ્રતિસાદ મળ્યો હતો. 

'થામા' નું ઓપનિંગ કલેક્શન

મેડોકની હોરર કોમેડી ફ્રેન્ચાઇઝીમાં સામેલ છે 'થામા'. મળતા અહેવાલ અનુસાર તેણે રિલીઝના પહેલા દિવસે જ 24 કરોડ રૂપિયાની કમાણી કરી લીધી છે. જણાવી દઈએ કે આ પ્રારંભિક આંકડા છે, અને સત્તાવાર ડેટા જાહેર થયા પછી તેમાં થોડો ફેરફાર થઈ શકે છે. 

'થામા' આયુષ્માનની સૌથી મોટી ઓપનર ફિલ્મ બની

'થામા'ને રિલીઝના પહેલા દિવસે જ દર્શકો તરફથી જબરદસ્ત પ્રતિસાદ મળ્યો. આદિત્ય સરપોતદાર દ્વારા દિગ્દર્શિત, આ ફિલ્મ પ્રભાવશાળી ઓપનિંગ ડે કલેક્શનની સાથે આયુષ્માન ખુરાનાની કારકિર્દીની સૌથી મોટી ઓપનર ફિલ્મ પણ બની ગઈ છે.

'થામા' એ આ રેકોર્ડ પણ તોડ્યો

'થામા'એ સ્ત્રી-2 સિવાયની બધી મેડોક ફિલ્મોના પહેલા દિવસના કલેક્શનને પાછળ છોડી દીધું છે. આ સાથે, તે મેડોકના હોરર યુનિવર્સની બીજી સૌથી વધુ ઓપનર ફિલ્મ બની ગઈ છે. 24 કરોડ રૂપિયાના ઓપનિંગ ડે કલેક્શન સાથે તેણે સ્ત્રીના 6.82 કરોડ, મુંજ્યાના 4 કરોડ અને ભેડિયાના 7.48 કરોડ રૂપિયાના ઓપનિંગ ડે કલેક્શનને પાછળ છોડી દીધું છે. જોકે, આ ફિલ્મ સ્ત્રી-2ના 51.8 કરોડ રૂપિયાના કલેક્શનને પાછળ છોડી શકી નથી.

વર્ષની 5મી સૌથી વધુ ઓપનર ફિલ્મ બની

'થામા' એ એટલું સારું પ્રદર્શન કર્યું કે તે વર્ષની પાંચમી સૌથી વધુ બોલિવૂડ ઓપનર બની ગઈ છે. આ છે વર્ષ 2025ની અત્યાર સુધીની ટોપ 5 ફિલ્મ: વોર 2 - 52.5 કરોડ રૂપિયા, છાવા - 33.10 કરોડ રૂપિયા, સિકંદર - 30.06 કરોડ રૂપિયા, હાઉસફુલ 5 - 24.35 કરોડ રૂપિયા અને થામા - 24 કરોડ રૂપિયા.