શું તમે બોર્ડની પરીક્ષાને લઈને ટેન્શનમાં છો? તણાવ વિના ઓછા સમયમાં આ રીતે તમારી જાતને કરો તૈયાર

સેન્ટ્રલ બોર્ડ ઓફ સેકન્ડરી એજ્યુકેશન (CBSE) દ્વારા ફેબ્રુઆરી મહિનામાં ધોરણ 10 અને 12ની બોર્ડની પરીક્ષાઓ લેવામાં આવશે. તારીખપત્રક અનુસાર, બંને ક્લાસની પરીક્ષાઓ 15 ફેબ્રુઆરી 2025થી શરૂ થશે. ધોરણ 10ની પરીક્ષા 18 માર્ચ સુધી અને ધોરણ 12ની પરીક્ષા 4 એપ્રિલ સુધી ચાલશે. આ સિવાય અન્ય રાજ્યોની બોર્ડની પરીક્ષાઓ પણ ફેબ્રુઆરીથી એપ્રિલમાં યોજાશે.

આ પણ વાંચો: JOB / SBIમાં સ્પેશિયાલિસ્ટ કેડર ઓફિસરની જગ્યાઓ પર થશે ભરતી, જાણો પસંદગી પ્રક્રિયા અને પગાર

જાન્યુઆરી મહિનો શરૂ થઈ ગયો છે. આવી સ્થિતિમાં વિદ્યાર્થીઓ પાસે તૈયારી માટે માત્ર એક જ મહિનો બાકી છે. કેટલાક બાળકો છેલ્લા કેટલાક મહિનાઓથી જોરશોરથી તૈયારી કરવાનું શરૂ કરે છે. તમે ગમે તેટલી તૈયારી કરો, બોર્ડની પરીક્ષાનો સમય જેમ જેમ નજીક આવે તેમ વિદ્યાર્થીઓમાં તણાવ વધવા લાગે છે. જોકે, યોગ્ય પ્લાનિંગ સાથે અભ્યાસ કર્યા પછી, તેઓ તેમની પરીક્ષામાં સારા માર્ક્સ લાવી શકે છે. અમે અહીં કેટલીક ટિપ્સ આપી રહ્યા છીએ, જે તમને ઓછા સમયમાં બોર્ડની પરીક્ષાઓની તૈયારી કરવામાં મદદ કરી શકે છે.

ટાઈમ ટેબલ બનાવો અને તેને ફોલો કરો

તમારી પાસે બોર્ડની પરીક્ષા માટે માત્ર એક મહિનો બાકી છે. આ સમય દરમિયાન તમારે ખૂબ મહેનત કરવાની જરૂર છે. આ માટે શક્ય તેટલું અભ્યાસ પર ધ્યાન કેન્દ્રિત કરો. અભ્યાસ માટે ટાઈમ ટેબલ બનાવીને તમામ વિષયોને સમય આપો. આમાં અઘરા વિષયો માટે વધુ સમય રાખો અને સરળ વિષયોને રિવિઝન માટે છોડી દો. આ રૂટિન સાથે તમારા અભ્યાસની શરૂઆત કરો. ધ્યાનમાં રાખો કે તમારે બધા વિષયો પર ધ્યાન કેન્દ્રિત કરવું પડશે. તમામ વિષયો પર સારી પકડ હોવી જરૂરી છે, જેથી તમે પરીક્ષામાં સારા માર્ક્સ મેળવી શકો. 

રોજના લક્ષ્યો નક્કી કરો

મોટા વિષયોને નાના ભાગોમાં વહેંચો. રોજના લક્ષ્યો સેટ કરો અને તેમને પૂર્ણ કરો. આ પદ્ધતિ તમને વિષયોને ઝડપથી આવરી લેવામાં મદદ કરી શકે છે. શેડ્યૂલ મુજબ અભ્યાસ કરવાની સાથે, વિષયોને આવરી લેવા માટે નાના લક્ષ્યો નક્કી કરવા ખૂબ જ મહત્ત્વપૂર્ણ છે.

રિવિઝન 

દરરોજ તમારો અભ્યાસ પૂર્ણ કર્યા પછી અને બીજા દિવસે અભ્યાસ શરૂ કરતા પહેલા દરેક વિષયનું શક્ય તેટલું રિવિઝન કરો. તમે રિવિઝન માટે નોટ અને શોર્ટકટ ફોર્મ્યુલાનો ઉપયોગ કરી શકો છો. રિવિઝન દરમિયાન અઘરા વિષયોને સરળ ભાષામાં અને ટૂંકમાં લખો. તે પરીક્ષા પહેલા ઝડપી રિવિઝન દરમિયાન પણ ઉપયોગી થઈ શકે છે.

પ્રેક્ટિસ ટેસ્ટ આપો

પાછલા વર્ષોની બોર્ડ પરીક્ષાના પ્રશ્નપત્રો ઉકેલો આ તમને પરીક્ષાની પેટર્નનો ખ્યાલ આપશે. પ્રશ્નપત્ર સમય મર્યાદામાં સોલ્વ કરવાની પ્રેક્ટિસ કરો. ઉપરાંત, ઘરે તમારા માટે મોક ટેસ્ટ સેટ કરો. આનાથી ટીમ મેનેજમેન્ટ અને લેખનની ઝડપ સુધારવાની તકો વધશે.

પરીક્ષાના દિવસ માટે ખાસ ટિપ્સ

પરીક્ષાના એક દિવસ પહેલા નવી વસ્તુઓ ન વાંચો. તમે અગાઉ જે પણ વાંચ્યું છે, તેને એકવાર વાંચો અને સમયસર સૂઈ જાઓ અને માનસિક શાંતિ જાળવી રાખો. પરીક્ષાના સમયે પ્રશ્નો ધ્યાનથી વાંચો અને તમારા સમયનો યોગ્ય ઉપયોગ કરો.