વિરાટ કોહલીએ આ શેરથી કરી 9 કરોડ રૂપિયાની કમાણી, જાણો ક્યાં અને કેટલું કર્યું હતું રોકાણ?

ટીમ ઈન્ડિયાનો મહાન બેટ્સમેન વિરાટ કોહલી આજે 36 વર્ષનો થઈ ગયો છે. 5 નવેમ્બર, 1988ના રોજ દિલ્હીમાં જન્મેલો કોહલી માત્ર ક્રિકેટ અને જાહેરાતોમાંથી જ કમાણી નથી કરતો, પરંતુ તેણે શેરબજારમાં પણ નોંધપાત્ર રોકાણ કર્યું છે. વિરાટ કોહલી અને અનુષ્કા શર્માએ ગો ડિજિટ જનરલ ઈન્સ્યોરન્સ લિમિટેડમાં રોકાણ કર્યું છે. તેણે ફેબ્રુઆરી 2020માં આ કંપનીમાં પૈસા રોક્યા હતા, જેની કિંમત હવે 4 ગણી વધી ગઈ છે.

આ પણ વાંચો: માત્ર 5 વર્ષમાં જ આ સ્ટોક્સે રોકાણકારોને બનાવી દીધા કરોડપતિ, લિસ્ટમાં ગુજરાતી કંપની પણ છે સામેલ

વિરાટ-અનુષ્કાએ ગો ડિજિટમાં કેટલું રોકાણ કર્યું?

મીડિયા રિપોર્ટ્સ અનુસાર, વિરાટ કોહલી અને અનુષ્કા શર્માએ ફેબ્રુઆરી 2020માં ગો ડિજિટ જનરલ ઈન્સ્યોરન્સમાં 2.5 કરોડ રૂપિયાનું રોકાણ કર્યું હતું, જેની કિંમત હવે વધીને 11 કરોડ રૂપિયાથી વધુ થઈ ગઈ છે. શેરબજારમાં ગો ડિજિટનું લિસ્ટિંગ 23 મેના રોજ થયું હતું. કંપનીના શેર 286 રૂપિયાના ભાવે લિસ્ટ થયા હતા. હવે તેની કિંમત 339.85 રૂપિયા થઈ ગઈ છે.

અહેવાલો અનુસાર, વિરાટ કોહલીએ 75 રૂપિયા પ્રતિ શેરના દરે ગો ડિજિટના 2,66,667 શેર ખરીદ્યા હતા. એટલે કે તેણે તેમાં લગભગ 2 કરોડ રૂપિયાનું રોકાણ કર્યું હતું. જ્યારે અનુષ્કાએ કંપનીના 66,667 શેર ખરીદ્યા હતા, જેના માટે તેણે 50 લાખ રૂપિયાનું રોકાણ કર્યુંહતું. બંનેએ મળીને 2.50 કરોડ રૂપિયાનું રોકાણ કર્યું હતું.

વિરાટ-અનુષ્કાના શેરની કિંમત 11 કરોડ રૂપિયાથી વધુ

હાલમાં ગો ડિજીટના શેરની કિંમત 339.85 રૂપિયા છે. એટલે કે વિરાટના 2 કરોડ રૂપિયાના રોકાણની કિંમત હવે વધીને 9.06 કરોડ રૂપિયા થઈ ગઈ છે. તે જ સમયે, અનુષ્કાના 50 લાખ રૂપિયાના રોકાણની કિંમત વધીને 2.26 કરોડ રૂપિયા થઈ ગઈ છે. તે મુજબ હવે બંને શેરની કુલ કિંમત વધીને 11.25 કરોડ રૂપિયાથી વધુ થઈ ગઈ છે.

ગો ડિજીટનું માર્કેટ કેપ 31000 કરોડ રૂપિયાથી વધુ 

તમને જણાવી દઈએ કે ગો ડિજિટ કંપનીનો આઈપીઓ 15 મેના રોજ ખુલ્યો હતો. કંપનીએ આ ઈસ્યુ દ્વારા 2,614.65 કરોડ રૂપિયા એકત્ર કર્યા હતા. કંપનીના શેરનું 52 સપ્તાહનું સર્વોચ્ચ સ્તર 407.40 રૂપિયા છે જ્યારે 52 સપ્તાહનું સૌથી નીચું સ્તર 272 રૂપિયા ​​છે. કંપનીના શેરની ફેસ વેલ્યુ 10 રૂપિયા છે. હાલમાં આ કંપનીની કુલ માર્કેટ કેપ 31,171 કરોડ રૂપિયા છે.