15 જાન્યુઆરીએ શેરબજાર ખુલ્લું રહેશે પણ સેટલમેન્ટ બંધ, જાણો રોકાણકારો પર શું થશે અસર?

15 જાન્યુઆરી, 2026ના રોજ શેરબજાર ખુલ્લું રહેશે, અને મહારાષ્ટ્રમાં મ્યુનિસિપલ ચૂંટણીઓ યોજાઈ રહી હોવા છતાં, તમે રાબેતા મુજબ શેરોની લે-વેચ કરી શકો છો. જો કે, તે દિવસે તમારા વ્યવહારો સેટલ (T+0) થશે નહીં.

બૃહન્મુંબઈ મ્યુનિસિપલ કોર્પોરેશન (બીએમસી) હેઠળના 29 મ્યુનિસિપલ કોર્પોરેશનોમાં 15 જાન્યુઆરીએ સ્થાનિક સંસ્થાઓની ચૂંટણીઓ યોજાવાની છે. આ કારણોસર, સરકારે તે દિવસે જાહેર રજા જાહેર કરી છે. આ રજાના કારણે મુંબઈની તમામ સરકારી કચેરીઓ બંધ રહેશે. આવી સ્થિતિમાં, દરેકના મનમાં આ પ્રશ્ન ઉભો થઈ રહ્યો છે કે શું 15 જાન્યુઆરીએ પણ બજાર બંધ રહેશે? એનએસઇ અને બીએસઇ દ્વારા જાહેર કરાયેલા રજાના કેલેન્ડર મુજબ, 15 જાન્યુઆરીએ શેરબજારમાં કોઈ રજા નથી. જોકે, એનએસઇ એ હવે નવી માહિતી જાહેર કરી છે જે બધા રોકાણકારોએ જાણવી જોઈએ.

એનએસઇએ આપી નવી જાણકારી
એનએસઇએ જણાવ્યું છે કે, 15 જાન્યુઆરી, 2026ના રોજ શેરબજારમાં સામાન્ય રૂપથી કારોબાર થશે પરંતુ મહારાષ્ટ્રમાં નગરપાલિકાઓની ચૂંટણીઓના કારણે આ દિવસે કોઇ ટ્રેડિંગ સેટલમેન્ટ એટલે કે પતાવટની પ્રોસેસ નહીં થાય. આનો અર્થ એ કે તે દિવસે તમારી લેવડ દેવડની પતાવટ (T+0) થશે નહીં.

સરળ શબ્દોમાં કહીએ તો, તમે 15 જાન્યુઆરી, 2026ના રોજ રાબેતા મુજબ શેર ખરીદી અને વેચી શકો છો, પરંતુ તે દિવસે શેરોની સત્તાવાર પતાવટ નહીં થાય. આ પતાવટની પ્રક્રિયા પછીના વર્કિંગ દિવસમાં થશે.

તેથી ગભરાવાની જરૂર નથી કારણ કે ટ્રેડિંગ પર તાત્કાલિક કોઈ અસર થશે નહીં પરંતુ રજાના કારણે સેટલમેન્ટમાં ફક્ત એક દિવસનો વિલંબ થશે.