Stock market: ભારે વધઘટના અંતે આઇટી શેરોમાં તેજી: સેન્સેક્સ 336 પોઇન્ટ વધ્યો, નિફ્ટી 25694 પર બંધ
છેલ્લું અપડેટ : 11 Nov 2025
મંગળવારે (11 નવેમ્બર) વૈશ્વિક બજારોમાં તેજી વચ્ચે ભારતીય શેરબજાર લીલા નિશાનમાં બંધ થયા હતા. જોકે, શરૂઆતના કારોબારમાં ખુલ્યા પછી તરત જ બજાર લાલ નિશાનમાં સરકી ગયું. પરંતુ બપોરના કારોબારમાં તે લીલા નિશાનમાં પાછો ફર્યો અને અંતે તે ઉપર બંધ થવામાં સફળ રહ્યો. અમેરિકા સાથે વેપાર સોદાના સમાચાર પર આઇટી શેરોમાં તેજીથી બજારને ફરીથી ઉછાળો મળ્યો. ઓટો અને મેટલ શેરોમાં ખરીદીને ટેકો મળ્યો.
30 શેરોવાળો બીએસઈ સેન્સેક્સ 100 પોઈન્ટથી વધુ વધીને 83,671 પર ખુલ્યો. તેમાં તરત જ વધઘટ થઈ, દિવસ દરમિયાન 83,124 જેટલો નીચો ગયો, પરંતુ અંતે 335.97 પોઈન્ટ અથવા 0.40 ટકાના વધારા સાથે 83,871.32 પર બંધ થયો.
તેવી જ રીતે, નેશનલ સ્ટોક એક્સચેન્જ (એનએસઇ)નો નિફ્ટી 50 એ 25,617 પર મજબૂત રીતે ખુલ્યો પરંતુ લાલ રંગમાં સરકી ગયો. જોકે, બપોરના કારોબારમાં તે લીલા રંગમાં પાછો ફર્યો. અંતે તે 120.60 પોઈન્ટ અથવા 0.47 ટકાના વધારા સાથે 25,694 પર બંધ થયો.
જિયોજીત ઇન્વેસ્ટમેન્ટ લિમિટેડમાં રીસર્ચ હેડ વિનોદ નાયરે જણાવ્યું હતું કે, "આજે સ્થાનિક બજારની શરૂઆત નરમાઈ સાથે થઈ હતી. રોકાણકારો દિલ્હી બોમ્બ વિસ્ફોટોની સંભવિત અસર અંગે ચિંતિત રહ્યા. જોકે, બજારે પાછળથી મજબૂત રિકવરી કરી અને દિવસના ઉચ્ચતમ સ્તરે બંધ થયું." વૈશ્વિક સંકેતોએ પણ આ વાતને સમર્થન આપ્યું. યુએસ સેનેટે અત્યાર સુધીના સૌથી લાંબા ફેડરલ શટડાઉનને સમાપ્ત કરતો બિલ પસાર કર્યો.
તેમણે કહ્યું કે, "મહત્વપૂર્ણ રીતે, બીજા ક્વાર્ટર ના પરિણામોની મોસમ તેના અંતને આરે છે અને તે સકારાત્મક રહેવાની અપેક્ષા છે. વ્યાપક બજારે અપેક્ષા કરતાં વધુ સારું પ્રદર્શન કર્યું છે," નાયરે જણાવ્યું હતું કે, "આજની તેજીમાં આઇટી, ઓટો, મેટલ અને એફએમસીજી ક્ષેત્રના શેરોએ નોંધપાત્ર યોગદાન આપ્યું હતું. રોકાણકારો હવે આગામી સ્થાનિક ફુગાવાના ડેટા પર નજર રાખી રહ્યા છે. ખાદ્ય પદાર્થોના ભાવમાં સતત ઘટાડાને કારણે ફુગાવો વધુ ઘટવાની અપેક્ષા છે."
આનાથી આરબીઆઇ દ્વારા નીતિગત દરમાં વધુ ઘટાડો થવાની શક્યતા વધશે. આગળ જોતાં, ત્રીજા ક્વાર્ટરમાં કોર્પોરેટ કમાણીમાં મજબૂત સુધારો થવાની અપેક્ષા છે. આ સુધારાને ઘણા સ્થાનિક પરિબળો દ્વારા ટેકો મળશે. જોકે, અમેરિકા સાથેનો વેપાર સોદો સફળતાપૂર્વક પૂર્ણ થાય છે કે નહીં તેના પર ઘણું નિર્ભર રહેશે.
ટોપ ગેનર્સ અને લૂઝર્સ
સેન્સેક્સની કંપનીઓમાં બીઇએલ, અદાણી પોર્ટ્સ અને મહીન્દ્રા એન્ડ મહીન્દ્રા સૌથી વધુ ફાયદામાં રહ્યા હતાં. જ્યારે બજાજ ફાઇનાન્સ, બજાજ ફીન સર્વ અને ટાટા મોટર્સ પી.વી. સૌથી વધારે ઘટીને બંધ રહ્યા હતાં. તેવી જ રીતે, એનએસઇ પર પર ઇન્ડિગો, બીઇએલ અને મહીન્દ્રા એન્ડ મહીન્દ્રા સૌથી વધુ વધ્યા હતા, જ્યારે બજાજ ફાઇનાન્સ, બજાજ ફિનસર્વ અને ઓએનજીસી સૌથી વધુ ઘટ્યા હતા.
નિફ્ટી 50ની કંપનીમાં સૌથી વધારે તેજી ઇન્ડસઇન્ડના શેરમાં જોવા મળી હતી. તેમાં 3.35 ટકાનો વધારો થયો હતો. આ પછી, ભારત ઇલેક્ટ્રોનિક્સ 2.51 ટકા, મહિન્દ્રા એન્ડ મહિન્દ્રા 2.33 ટકા, અદાણી પોર્ટ્સ 2.05 ટકા, એચસીએલ ટેક 1.92 ટકા વધ્યા.
નિફ્ચી-50 કંપનીઓમાં સૌથી વધારે નુકસાન બજાજ ફાઇનાન્સના શેરને થયું હતું, તેમાં 7.36 ટકાનો ઘટાડો થયો હતો. આ પછી, બજાજ ફિનસર્વ 6.09 ટકા, ઓએનજીસી 0.78 ટકા, ટાટા મોટર્સ 0.70 ટકા, એપોલો હોસ્પિટલ્સ 0.38 ટકા ઘટ્યા હતા.
વ્યાપક બજારમાં, સૂચકાંકો મિશ્ર બંધ થયા. નિફ્ટી મિડકેપ 100 ઇન્ડેક્સ 0.50 ટકા વધ્યો, જ્યારે સ્મોલકેપ ઇન્ડેક્સ 0.21 ટકા ઘટ્યો.
સેક્ટરલ ઇન્ડેક્સના મોરચે, નિફ્ટી આઇટી અને ઓટો સૌથી વધુ વધ્યા હતા, જેમાં અનુક્રમે 1.20 ટકા અને 1.07 ટકાનો વધારો થયો હતો. દરમિયાન, નિફ્ટી પીએસયુ બેંક 0.39 ટકા ઘટ્યો હતો.
ભારત-યુએસ વેપાર સોદો ટૂંક સમયમાં થવાની અપેક્ષા
અમેરિકી રાષ્ટ્રપતિ ડોનાલ્ડ ટ્રમ્પે સંકેત આપ્યો હતો કે, વૌશિંગ્ટન અને નવી દિલ્હી એક નવા ટ્રેડ ડીલને અંતિમ રૂપ આપવાની તૈયારી કરી રહ્યા છે. તેમણે એમ પણ કહ્યું કે ભારત પર લાદવામાં આવેલા ટેરિફ સમય જતાં ઘટાડી શકાય છે. ટ્રમ્પે ભારતમાં નવા યુએસ રાજદૂત સર્જિયો ગોરને શપથ લેવડાવતા આ ટિપ્પણીઓ કરી હતી.
તેમણે જણાવ્યું હતું કે, અમે ભારત સાથે સમજૂતિ કરવા અંગે કામ કરી રહ્યા છીએ, જે પહેલા કરતાં બિલકુલ અલગ હશે. તેમને હવે હું ગમતો નથી, પણ તેઓ મને ફરીથી ગમશે. અમે એક વાજબી સોદો કરી રહ્યા છીએ. તેઓ સારી વાટાઘાટો કરે છે, તેથી સર્જિયો, તમારે આ પર ખૂબ ધ્યાન આપવું પડશે. મને લાગે છે કે આપણે કંઈક એવું શોધવાની નજીક છીએ જે દરેક માટે કામ કરે."
વૈશ્વિક બજારો
વૈશ્વિક સંકેતોને પ્રતિબિંબિત કરતા એશિયન બજારો પણ વધ્યા. જાપાનનો નિક્કી 225 0.56%, દક્ષિણ કોરિયાનો કોસ્પી 2.24% અને હોંગકોંગનો હેંગ સેંગ 0.4% ના વધારા સાથે બંધ થયો.
સોમવારે વોલ સ્ટ્રીટમાં જોરદાર તેજી જોવા મળી. એનવિડિયા અને પાલનતીર જેવી એઆઇ -કેન્દ્રિત કંપનીઓના શેરમાં મજબૂત તેજીથી રોકાણકારોના સેન્ટિમેન્ટમાં વધારો થયો. યુએસ સરકારના શટડાઉનના અંતની અપેક્ષાઓએ પણ બજારને ટેકો આપ્યો. S&P 500 1.54% અને નાસ્ડેક 2.27% વધ્યો, જ્યારે ડાઉ જોન્સ ઇન્ડસ્ટ્રિયલ એવરેજ 0.81% વધ્યો.